Petropavlda jeke tulǵalar 1,2 mlrd teńge mıkrokredıtti joǵary paıyzben zańsyz bergen

PETROPAVL. KAZINFORM – Petropavlda mamandar lıtsenzııasyz jumys istep kelgen mıkroqarjy uıymynyń jumysyn toqtatty. Bul týraly brıfıngide Soltústik Qazaqstan oblysy boıynsha ekonomıkalyq tergeý departamenti basqarmasy basshysynyń orynbasary Azamat Nurbaev aıtty. 

Keıingi jyldary elimizde mıkronesıeleý qyzmetine suranys artqan. «Tez», «ońaı», «anyqtamasyz» nesıe beremiz degen uıymdardyń kópshiliginiń maqsaty – halyqty aldap, qanaý.

Zańnamaǵa sáıkes, qarjy naryǵynda kásibı qyzmetti tek ruqsat etilgen lıtsenzııasy bar uıymdar ǵana júzege asyra alady. Mundaı lıtsenzııasyz júrgizilgen kez kelgen áreket zańsyz kásipkerlik bolyp sanalady.

– Lıtsenzııasyz jumys isteıtin jeke tulǵalar men uıymdar zańdy aınalyp ótip, halyqqa joǵary paıyzben nesıe usynyp, túrli jasyryn komıssııalar qosyp, adamdardy qaryzǵa belshesinen batyrady. Zań boıynsha mıkrokredıttiń jyldyq tıimdi syıaqy mólsherlemesi 56%-dan aspaýy kerek. Al keıbir uıymdar ony 800%-ǵa deıin jetkizgen. Mundaı jaǵdaıda adam bir ret nesıe alyp, jyldar boıy odan qutyla almaı, qarjylyq tyǵyryqqa tireledi, - deıdi Azamat Nurbaev.

Qarjylyq monıtorıng agenttigi men Ekonomıkalyq tergeý departamentteri bıyl elimiz boıynsha lıtsenzııasyz jumys istep kelgen bes mıkroqarjy uıymyn jaýyp, olardyń zańsyz áreketterin toqtatty. Olardan 300 myńnan astam azamat zardap shekken, jalpy shyǵyn kólemi — 71 mlrd teńge. 

– Petropavlda da jeke tulǵalar kepilmen nesıe berip, joǵary paıyz jáne jasyryn komıssııalar arqyly azamattardyń qaltasyna qol salǵan. Osylaısha materıaldyq shyǵyn keltirdi. Olar nesıege bergen somanyń jalpy mólsheri – 1,2 mlrd teńge. Tergeý barysynda qujattar tárkilenip, osy fakti boıynsha qylmystyq is qozǵaldy, - deıdi Azamat Nurbaev.

Mamandar mıkroqarjylyq uıymnan nemese jeke tulǵadan qaryz almas buryn lıtsenzııasyn tekserýdi jáne kelisimshartqa qol qoımas buryn muqııat tanysýǵa keńes beredi.

Buǵan deıin elimizde mıkrokredıt berý qaǵıdalary bekitilgenin jazǵan edik.