Petropavlda jeke sektordaǵy órttiń aldyn alý úshin qamys shabylyp jatyr
Petropavlda bıyl qýraǵan qamysty shabý jumysy qolǵa alyndy.
Ótken jyldyń qateligin qaıtalamaý úshin tótenshe jaǵdaılar qyzmeti men jergilikti bılik birge áreket etýde.
«Órt qaýipti kezeńniń aldynda bizdiń mamandar jeke sektor turǵyndarymen, ónerkásip aımaqtaǵy kásiporyndar ıelerimen kezdesip, aldyn alý jumystaryn júrgizip jatyrmyz. Qýraǵan shópti, qoqysty jáne turmystyq qaldyqtardy jaǵýǵa tyıym salynǵanyn eske salamyz. Sondaı-aq, órt shyǵý qaýpi joǵary aýdandarda jergilikti atqarýshy bıliktiń kómegimen qýraǵan qamysty shapqyzyp jatyrmyz. Órt bola qalǵan jaǵdaıda turǵyn úılerge taramaýy úshin keıin mıneraldy jolaqtar jasaımyz. Zańǵa qaıshy eldi meken aýmaǵynda qýraǵan shóp pen qoqysty jaqqandarǵa ákimshilik jaza bar. Jeke tulǵalarǵa 20 AEK mólsherinde aıyppul salynady», - deıdi Petropavl qalalyq tótenshe jaǵdaılar basqarmasynyń aǵa ınjeneri Danıel Sarkısıan.
Byltyr kepken shópti jaǵýdan úsh iri órt tirkeldi. Saldarynan turǵyn úılerge zaqym keldi.
Al qoqys pen qýraǵan shópti jaqqan 100 adamǵa aıyppul salyndy.
«Ótken jyly Qapaı shaǵynaýdanynda ruqsat etilmegen qoqys ornynda órt shyqty. Jalyn úsh turǵyn úıge taralyp, ol baspanalar tolyq janyp ketti. Aıyppul turaǵynda órt shyqty. 6 kólik tolyq janyp ketse, 4-ýi zaqymdandy. Onda da bireýler kepken shópke ot qoıǵan. Hromzaýyt shaǵyn aýdanynda da órt shyǵyp, turǵyn úıler, qora-qopsy jandy. Qamysty shabý jumysy Bereke, Hromzaýyt shaǵyn aýdanynda, ónerkásip aımaǵynda, Zarechnyı kentinde saıajaılardyń mańynda júrgiziledi. Óıtkeni byltyr «Renet» saıajaı qoǵamdastyǵynda kepken shópti jaǵýdyń sońy úlken órtke ulasyp, 200 saıajaı ýchaskesindegi úıler, qurylystar janyp ketti», - deıdi Danıel Sarkısıan.
Petropavl qalalyq ákimdigi baspasóz qyzmetiniń málimetinshe, jospar boıynsha 250 ga aýmaqtyń qamysy shabylmaq.
Ázirge Oıqala aýmaǵynda 20 adam jumys istep jatyr.
