Petropavlda jeke 107 turǵyn úıdi sý basýy múmkin

PETROPAVL. QazAqparat – Petropavlda kóktemgi sý tasqyny kezinde 107 jeke turǵyn úı sý basý qaýpi bar. Olardyń turǵyndary úshin qaladaǵy 4 mektepte 130 oryndyq evakopýnkt ashyldy, dep habarlaıdy QazAqparat tilshisi.

Petropavl ákimi Bolat Jumabekov SQO-nyń ákimdik otyrysynda atqarylyp jatqan jumystar boıynsha esep berdi. Aıtýynsha, kóktemgi sý tasqynynyń aldyn alýǵa jáne saldaryn joıýǵa qalalyq rezervte 30 mln teńge, qosymsha shuǵyl shyǵyndarǵa 26 mln teńgege jýyq qarajat bar.

«Ótken jyldardy saralaıtyn bolsaq, sońǵy tórt jylda qalada 240 turǵyn úıge erigen qar sýy kirdi. Biraq jańa jelilerdi salý jáne tereńdik sorǵysyn ornatý nátıjesinde bul úılerdiń sany 107-ge deıin qysqardy. Bıyl kóktemde sý tasqyny bolǵan jaǵdaıda tazartý qurylystary kásiporny 83 tehnıkany shyǵarady. Budan basqa jetkilikti mólsherde janar-jaǵar maı, qum, tsement, balshyq, qaptar ázirlendi. Budan basqa 6 motrly qaıyq, 20 arnaıy kıim bar», - deıdi Bolat Jumabekov.

Qala ákiminiń aıtýynsha, 14 aqpannan bastap kóshelerdegi ashyq sýaǵarlardyń muzy oıylyp, tazartylyp jatyr. Sońǵy eki jyldyń ishinde uzyndyǵy 20 km bolatyn nóserlik kárizder salynǵan. Bıyl bul jumystar jalǵasyn tappaq.

«25 aqpan kúni evakýatsııalyq pýnktterdiń jumysyn pysyqtaýǵa arnalǵan jattyǵý ótedi. Petropavlda № 12, № 13, № 14 jáne № 40 mektepterde 130 oryndyq evakopýnkt ashyldy. Ol jerde bul oryndarǵa jaýaptylar bekitildi, medıtsınalyq pýnktter quryldy.

Qalanyń veterınarlyq qyzmeti naýryz aıynan bastap jeke turǵyn úılerdi aralap, mal-qus sanyn anyqtaıdy. Keıin olardy sý basqan aýmaqtan shyǵarý úshin arnaıy ýaqytsha oryn ázirlenedi. Qazir maldardy shyǵarýǵa qajet tehnıka, jem-shóppen qamtý máselesin sheship jatyrmyz. Sý basý qaýpi bar Zarechnyı, Bylǵary zaýyt, Oıqala aýdandarynyń turǵyndarymen kezdesip, túsindirý jumystaryn júrgizip jatyrmyz», - deıdi Petropavl ákimi.