Petropavlda jedel járdemge júginetinder sany eki esege jýyq azaıdy
PETROPAVL. QazAqparat – Petropavlda jedel járdem qyzmetine kelip túsetin qońyraý shilde aıymen salystyrǵanda 43 paıyzǵa tómendegen, dep habarlaıdy QazAqparat.
Soltústik Qazaqstan oblysy jedel medıtsınalyq járdem ortalyǵy bas dárigeriniń orynbasary Vladımır Jýjgovtyń aıtýynsha, indet bastalǵanǵa deıin olarǵa kúnine 400-den astam qońyraý shalynatyn. Shilde aıynda koronavırýsty juqtyrý sharyqtaý shegine jetkende jedel járdem qyzmetiniń jumysy da kóbeıdi. Tek 5 shilde kúni Petropavl qalasynda ǵana 700-den shaqyrtý túsken.
«Búginde jaǵdaı turaqtandy. Táýligine kóp degende 400-deı adam habarlasady. Tamyzdyń 1-i men 13-ine deıingi aralyqty alatyn bolsaq jalpy shaqyrtýdyń 43%-ǵa kemigenin kóremiz. Al ókpeniń qabynýy men jedel respıratorly vırýs ınfektsııasy boıynsha shaqyrtý 73%-ǵa azaıdy», - deıdi Vladımır Jýjgov.
Oblystaǵy jedel járdem qyzmetinde qazir 31 arnaıy kólik bar. Onyń 17-si Petropavlda, qalǵandary aýdan ortalyqtarynda. Óńir boıynsha bir táýlikte 40-qa jýyq jedel járdem brıgadasy kezekshilikke túsedi.
«Jedel medıtsınalyq járdem ortalyǵynda qazir maman tapshylyǵy máselesi joq. Materıaldyq baza nyǵaıtylyp jatyr. Ókpeni jasandy jeldetý apparaty, pýlsoksımetr alyndy. Aı sońyna deıin avtopark 18 jańa reanımobılmen tolyǵady. Qalǵan 20-sy da kóp uzamaı jetkizilmek», - deıdi SQO jedel medıtsınalyq járdem ortalyǵy bas dárigeriniń orynbasary.
