Petropavlda jedel járdem nelikten keshigedi
PETROPAVL. QazAqparat - Soltústik Qazaqstan oblysynyń memlekettik qyzmet isteri jáne sybaılas jemqorlyqqa qarsy is-qımyl departamentinde vedomstvoaralyq jumys tobynyń otyrysynda jedel medıtsınalyq kómek máseleleri talqylandy, dep habarlaıdy QazAqparat tilshisi.
Jedel járdem jumysy áleýmettik jelilerde, Petropavl men oblys ákimderiniń eseptik kezdesýlerinde jıi talqylanady. Qala turǵyndary olardyń tez kelmeıtinine, zembilder men sanıtarlardyń joqtyǵyna shaǵym túsirip jatyr.
Bul jaǵdaıdy oblystyq jedel medıtsınalyq kómek kórsetý ortalyǵy bas dárigeriniń mindetin atqarýshy Svetlana Kashemırova túsindirdi. Onyń aıtýynsha, byltyr oblys boıynsha jedel járdem jumysyna 18 shaǵym túsip, sonyń ishinde tek bireýi dáıekti bolyp shyqqan.
«QR DS 2017 jylǵy №450 buıryǵyna sáıkes, túsken ótinishter tórt sanatqa bólinedi. 1-3 sanatta - adam ómirine, densaýlyq jaǵdaıyna qaýipti jaǵdaılar. Mundaı kezde jedel járdem tez arada barady. 4-sanatta - adam ómirine qaýip tónbeıdi. Ótinish emhana janyndaǵy kómek kórsetý bólimine beriledi. Ár sanatta naqty belgilengen barý erejesi bar. 4-sanat boıynsha - 60 mınýtqa deıin jetýine bolady», - dedi S.Kashemırova.
Ol jedel járdem shaqyrylǵannan keıin bir saǵat ótken soń da jetken kezder bolǵanyn aıtty. Bul, ásirese, JRVI órshigen kezde bolǵan.
Otyrysta belgili bolǵandaı, №450 buıryqtaǵy shtattyq normatıvte sanıtarlar múldem joq. Tek feldsher men dáriger. Óńirdegi feldsherlerdiń basym bóligi - áıelder. Olar naýqastardy jetkize almaıdy. Soǵan qaramastan, olarǵa júrgizýshiler kómektesip jatyr.
Densaýlyq saqtaý basqarmasy basshysynyń orynbasary Nurlan Aımanovtyń aqparaty boıynsha, jedel járdem jumysyndaǵy máseleler dáriger jetispeýshiliginen de týyndap otyr.
Avtor: Olesıa Jýkoven
