Petropavlda jedel járdem qyzmetkerleri kólik ishinde týyp, tirshilik belgisi bolmaǵan náresteni qutqardy

PETROPAVL. QazAqparat – Petropavlda jedel járdem qyzmetkerleri jańa týǵan náresteni qutqardy. Der kezinde kórsetilgen medıtsınalyq kómek nátıjesinde sharana ólim aýzynan qaldy, dep habarlaıdy QazAqparat tilshisi.

Soltústik Qazaqstan oblysy jedel medıtsınalyq kómek kórsetý ortalyǵynyń dırektory ıÝrıı Belonogtyń aıtýynsha, oqıǵa sáýir aıynyń sońynda bolǵan. Ortalyqqa Petropavldaǵy 19 yqsham aýdanda Nıva kóliginde áıeldiń bosanǵandyǵy týraly habar túsedi.

Oqıǵa ornyna jedel járdem kóligimen feldsher Aleksandr Rema men onyń júrgizýshisi Amangeldi Turǵymbaev jetedi. Maman kelgen kezde náreste kindigi moınyna oralyp týǵan eken, saldarynan es-tússiz jatqan, dem alǵany bilinbegen. Apgar shkalasy 3-ti kórsetken.

Feldsher kógerip ketken balany qutqarýǵa kirisedi.

«Náreste merzimi kelip, ýaqytynda týǵan. Salmaǵy 2700 gramm. Áıeldiń de bul úshinshi balasy. Perınataldyq ortalyqqa jetip úlgermegen.

Feldsher birden kólik ishinde reanımatsııaǵa kirisip, keıin qutqarý sharasyn PALS standarty boıynsha jedel járdem kóliginde jalǵastyrdy. Nátıjesinde 5-6 mınýttan keıin náreste ózdiginen dem alyp, Apgar shkalasy 5 bollǵa deıin kóterildi», - deıdi ıÝrıı Belonog.

Jedel járdem kóligi náresteni aman-esen perınataldyq ortalyqqa jetkizip, mamandarǵa tabystady.

Oblystyq perınataldyq ortalyqta bala birden jansaqtaý bólimine aýystyrylyp, reanımatologtar men neonatologtar tıisti iske kiristi.

Perınataldyq ortalyq dırektory Elena Kalıýjnaıanyń aıtýynsha, búgin anasy men bala úılerine jiberildi. Ekeýiniń de jaǵdaıy jaqsy.