Petropavlda jedel járdem kóligi aýdaryldy
PETROPAVL. QazAqparat – Petropavl kósheleriniń birinde jedel járdem kóligi bir jaq janyna aýdarylyp qaldy, dep habarlaıdy QazAqparat tilshisi.
Jambyl kóshesindegi apat ornynan túsirilgen sýretter áleýmettik jelilerde jarııalandy.
«46 jastaǵy jedel járdem kóliginiń júrgizýshisi ózin nashar sezinip, róldi basqara almaı, qarsy baǵytqa shyǵyp ketip, Audi avtokóligimen soqtyǵysqan. Osydan jedel járdem avtokóligi oń jaqqa aýdarylǵan», - dep túsinik berdi polıtsııa departamentiniń baspasóz qyzmetinde.
Jedel járdem kóliginde júrgizýshimen birge feldsher men medbıke bolǵan. Qýanyshqa oraı, eshkim zardap shekken joq. 46 jastaǵy júrgizýshi (jedel járdem kóliginiń jurgizýshisi-red) úshinshi qalalyq aýrýhanaǵa jetkizildi, medıtsınalyq kómek kórsetildi. Ol aýrýhanaǵa jatýdan bas tartty.
«Atalǵan jol-kólik oqıǵasy boıynsha materıal jınalyp, protsessýaldyq sheshim qabyldaý úshin Petropavl qalalyq polıtsııa basqarmasynyń ákimshilik polıtsııa bólimine jiberildi», - dep atap ótti baspasóz qyzmetinde.
