Petropavlda jazýshy Ivan Shýhovtyń jádigerleri qoıylǵan kórme ótýde

PETROPAVL. QazAqparat – Petropavlda belgili jazýshy, aýdarmashy Ivan Shýhovtyń 115 jyldyq mereıtoıyna oraı jeke zattarynyń jáne qoljazba-kúndelikteriniń kórmesi jumys istep jatyr, dep habarlaıdy QazAqparat tilshisi.

Kórme Petropavldaǵy Abylaı han rezıdentsııasy mýzeı-kesheninde ashyldy. Kórermen nazaryna Jambyl aýdanynyń ortalyǵy Presnovkadaǵy Ivan Shýhov ádebı-memorıaldyq mýzeı-úıinen ákelingen jádigerler qoıyldy. Іshinde jazýshynyń kózildirigi, qol sómkesi, baspa mashınasy, qoljazba kúndelikteri men kóptegen fotosýretter bar.

«Іshindegi eń qyzyqty eksponattardyń biri dep jazýshynyń qolmen jazǵan kúndelikterin aıtýǵa bolady. Sondaı-aq 1931 jyly jaryqqa shyqqan «Gorkaıa lınııa» jáne 1932 jyly basylǵan «Nenavıst» kitaptarynyń alǵashqy basylymdary qoıylǵan. Ivan Shýhovtyń eńbekteri birneshe shet tilge – frantsýz, rýmyn, ýkraın tilderine jáne qazaqshaǵa da aýdarylǵan. Ózi de aýdarmamen aınalysqan. Jerles jazýshylar Sábıt Muqanov, Ǵabıt Músirepovpen dos bolǵan, olardyń eńbekterin orysshalaǵan», - deıdi «Abylaı han rezıdentsııasy» mýzeı-kesheni dırektorynyń orynbasary Ásemgúl Qydbekova.

Qazaqstandyq sýretshi Anatolıı Býrgaevtyń kartınasy soǵan dálel. Sýrette úsh jazýshynyń áńgimelesip otyrǵan mamyrajaı sáti beınelengen.

«Ivan Shýhov «Presnovskıe stranıtsy» degen kitabynda Ǵabıt Músirepov jáne Sábıt Muqanovpen qalaı tanysqany jaıly aıtady. Bala kúninde jazýshy ákesi Petr Semenovıchpen birge kórshi aýylǵa barady. Sol jerde oınap júrip balalarmen kelispeı, tóbelesip qalady. Bolashaq jazýshylardyń dostyǵy osylaı bastalǵan eken», - deıdi Ásemgúl Qydbekova.

Ivan Petrovıch Shýhov 1906 jyly 31 shildede SQO Jambyl aýdany Presnovka aýylynda týǵan. 1977 jyly 71 jasynda Almatyda qaıtys boldy. 1981 jyly týǵan aýylynda, jazýshy turǵan úıde ádebı-memorıaldyq mýzeı-úıi ashyldy.

Al jazýshynyń mereıtoıyna arnalǵan Petropavldaǵy kórme apta sońyna deıin jumys istemek.