Petropavlda jazasyn óteýshi Abaıdyń bıiktigi 3 metrlik sýretin saldy
Soltústik Qazaqstan oblysy Qylmystyq atqarý júıesi departamenti baspasóz qyzmetiniń málimetinshe, Petropavldaǵy ES-164/3 mekemesindegi ǵımarattardyń biriniń qabyrǵasynda Abaıdyń portreti paıda boldy. Bıktigi 3 metr, uzyndyǵy 5 metr bolatyn týyndynyń avtory – osynda jazasyn óteýshilerdiń biri. Qaırosh bul sýretti 2 kúnniń ishinde salyp shyqqan.
«Aldymen qaryndashpen salyp aldym, sosyn aq-qońyr boıaýmen boıadym. Qabyrǵaǵa sýret salǵanda qatelespeýge tyrystym, óıtkeni tez boıamasa boıaý aǵyp ketedi. Abaıdyń beınesin aına-qatesiz shyǵarý úshin mekeme kitaphanasyndaǵy aqynnyń kitaptaryn aqtardym», - deıdi sýrettiń avtory.
Bul - Qaıroshtyń Abaıǵa arnaǵan ekinshi eńbegi. Ol buǵan deıin aqynnyń músinin gıpsten jasaǵan edi. Abaı Qunanbaev – onyń súıikti aqyndarynyń biri. Shyǵarmalarymen jaqsy tanys, tipti Abaıdyń 15 óleńin jatqa biledi. Qara sózderinen ǵıbrat alýǵa tyrysady. Sol sebepti aqynnyń sýretiniń qasyna onyń 18-shi qara sózin de jazǵan.
«Abaıdyń qara sózderin oqyǵan saıyn odan jańa maǵyna tabasyń. Jaza basyp, qylmys jasaǵanyma qazir qatty ókinemin. Bir jylyn ótedim, áli eki jyly bar. Bostandyqta meni týǵan qyzym kútýde. Skype arqyly únemi habarlasyp turamyz. Mekeme basshylyǵyna osyndaı múmkindik bergeni úshin alǵys aıtamyn», - deıdi Qaırosh.
Qaıroshqa sýret salý óneri ákesinen daryǵan eken. Qazir ol qoly bos ýaqytta mekemeniń sheberhanasynan tabylady.
«Qaırosh «Densaýlyqqa qasaqana aýyr zııan keltirý» baby boıynsha jazasyn ótep jatyr. Úsh jylǵa jaza kesildi. Bizge kelgen kúnnen bastap shyǵarmashylyqpen aınalysýǵa nıet bildirdi. Qoldanbaly óner sektsııasynda aınalysady. Іs-sharalarǵa belsendi qatysqany, adal eńbegi úshin birneshe ret alǵys aldy», - deıdi SQO QAJD ES-164/3 mekemesiniń bastyǵy Tamerlan Valıev.
