Petropavlda jaıaý júrginshilerge arnalǵan kóshede kólik júrgizgen jigit jazalandy
PETROPAVL. QazAqparat – Petropavlda kólik júrgizýshisi jaıaý júrginshilerge arnalǵan kóshede turǵan Táýelsizdik stellasyn kóligimen aınalyp, onyń beınejazbasyn áleýmettik jelige júktegen, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 20 aqpan kúni keshke SQO-nyń Instagram -pablıkteriniń birinde 12 sekýndtyq beınerolık paıda boldy. Beınejazbadan Qazaqstan Konstıtýtsııasy kóshesindegi Táýelsizdik stellasyn aınalyp júrgen qara tústi Toyota Camry kóligin kórýge bolady. Bul kóshe jaıaý júrginshilerge arnalǵandyqtan, kólikpen júrýge tyıym salynǵan. Tıisti jol belgisi de tur.
«Beınerolıkke jeli qoldanýshylary pikir bildirip, buzaqynyń áreketin synǵa aldy. Bul kezde Petropavl qalalyq polıtsııa basqarmasy patrýldik polıtsııa batalonynyń qyzmetkerleri quqyq buzýshyny anyqtaý boıynsha izdestirý is-sharalaryna kirisken edi. Avtokólik polıtsııanyń Jedel baqylaý ortalyǵynyń beıne baqylaý kameralarynyń muraǵatyn zerdelegennen keıin anyqtaldy. Quqyq buzýshy ustaldy», - deıdi SQO Polıtsııa departamenti patrýldik polıtsııa batalonynyń komandıri Qanat Álimjanov.
Oqıǵa 17 aqpan kúni keshke bolǵan. Petropavldyń 19 jastaǵy turǵyny dosynyń kóligin minip, júrgizý qabiletin kórsetpekshi bolǵan. Ol júrgizýshi kýáligin osydan bir apta buryn, 10 aqpan kúni alǵan eken.
«Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý» baby boıynsha materıal jınastyryldy. Jas júrgizýshi óziniń kinásin moıyndady. Soltústikqazaqstandyqtardan keshirim surap beınejazba qaldyrdy.
