Petropavlda jaıaý júrginshilerdiń kesirinen bıyl 1 adam qaza taýyp, 74-i jaraqat aldy
PETROPAVL. QazAqparat - Soltústik Qazaqstan oblysynyń joldarynda «Nazar aýdaryńyz, júrginshi!» respýblıkalyq jedel-aldyn alý is-sharasy ótip jatyr. 29-qazanda bastalǵan aktsııa qarashanyń 2-si kúni aıaqtalmaq, dep habarlaıdy QazAqparat.
Tártip saqshylarynyń aıtýynsha, joldaǵy qaıǵyly oqıǵalardyń jartysy jaıaý júrginshilerdiń kinásinen bolady eken. Júrginshilerdiń eń basty qatelikteri - joldy baǵdarshamnyń tyıym salynǵan belgisine qaramaı nemese joldy belgilenbegen jerden kesip ótýi.
«Jyl basynan beri 4900-ge tarta júrginshi ákimshilik jaýapkershilikke tartyldy. Júrginshilerdiń qatysy bar 26 jol-kólik apaty boldy. Onyń teń jartysy tikeleı júrginshilerdiń kinásynan bolǵan», deıdi oblystyq PD Jergilikti polıtsııa qyzmetiniń aǵa ınspektory Baıan Baıǵaskına.
Jedel - aldyn alý is sharasy bastalǵan 4 kúnniń ishinde oblys joldarynda 682 jolda júrý erejesin buzý faktisi anyqtaldy. Júrgizýshilerdiń 21-i júrginshilerdi arnaıy jolaqtan ótkizbegen, 7-ýi kóshe qıylystarynan ótý erejesin buzǵan. Taǵy 7-ýi masań kúıde avtokólikti basqarsa, 108 jol erejesi jaıaý júrginshilerdiń tarapynan buzylǵan.
Jalpy, jyl basynan Petropavl joldarynda júrginshilerdiń qatysýymen 26 jol-kólik oqıǵasy tirkelgen, sonyń saldarynan 1 adam qaza taýyp, 74 adam jaraqat aldy.
«Nazar aýdaryńyz, júrginshi!» jedel-aldyn alý is-sharasy 2 qarashaǵa deıin jalǵasady. Polıtsııanyń maqsaty aıyppul salyp, jazalaý emes. Jol qozǵalysynyń barlyq qatysýshylaryna joldaǵy tártip erejelerin qatań saqtaý qajettigin túsindirip, jetkizý»,-deıdi tártip saqshylary.
Aqerke Qabykeeva
