Petropavlda jataqhanada sıntetıkalyq esirtki satyp kelgen áıel ustaldy
Petropavldyń 47 jastaǵy turǵyny jataqhanadaǵy bólmesinde sıntetıkalyq esirtki satty degen kúdikpen ustaldy. Endi ol 10 jylǵa deıin bas bostandyǵynan aıyrylýy múmkin, dep habarlaıdy Kazinform.
Soltústik Qazaqstan oblysy polıtsııa departamenti baspasóz qyzmetiniń málimetinshe, kúdikti áıel oblys ortalyǵyndaǵy jataqhanalardyń birinde esirtki satyp qana qoımaı, ony sol jerde qoldanýǵa ruqsat bergen. «Bıznesti» tórtinshi synypta oqıtyn, ózimen turatyn qyzynyń kózinshe júrgizgen. Polıtsııaǵa bul jaǵdaı týraly kórshileri habarlaǵan eken.
SQO PD esirtki qylmysyna qarsy is-qımyl basqarmasynyń qyzmetkerleri aqparatty tekserdi. 47 jastaǵy qala turǵyny «tuz» degen ataýmen belgili α-PvP esirtkisiniń tórt túıinshegimen ustaldy.
«Atalǵan fakti QR Qylmystyq kodeksiniń 297-baby «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha sotqa deıingi tergep-tekserýlerdiń biryńǵaı tizilimine tirkeldi. Baptyń sanktsııasy 10 jylǵa deıingi merzimge bas bostandyǵynan aıyrý túrindegi jazany kózdeıdi. Kúdikti kúzetpen qamaýǵa alyndy», - deıdi Esirtki qylmysyna qarsy is-qımyl basqarmasynyń bastyǵy Rýslan Saparov.
Qyz bala qazir ájesimen turyp jatyr. Zeınetker jıenin jaqynda qamqorlyǵyna alýdy josparlap otyr.
Jalpy, SQO-da 11 aıdyń ishinde esirtki ótkizýdiń 104 faktisi tirkeldi.
