Petropavlda jataqhanada órt shyǵyp, 130 adam qaýipsiz jerge shyǵaryldy
PETROPAVL. QazAqparat – Petropavldaǵy jataqhanalardyń birinde órt shyǵyp, 126 adam qaýipsiz jerge shyǵaryldy. Turǵyndardyń tórteýin evakýatsııalaý úshin avtosatyny qoldanýǵa týra keldi, dep habarlaıdy QazAqparat tilshisi.
SQO tótenshe jaǵdaılar departamentiniń málimetinshe, 15 sáýir kúni saǵat 23.39 mınýt ketkende 101 pýltine Petropavldaǵy Toqsan bı kóshesi, 84 mekenjaıyndaǵy jataqhana dálizderiniń kók tútinge oranǵandyǵy jóninde habarlama túsken.
Oqıǵa ornyna jetken órt sóndirýshiler jataqhananyń barlyq bes qabatyndaǵy dálizderdiń qalyń tútinge oranǵanyn kórgen. Mamandar jataqhana turǵyndaryn - 126 adamdy, sonyń ishinde 42 balany evakýatsııalady. Arnaıy avtotehnıka arqyly 4 qabattan bir otbasy músheleri - eki eresek jáne eki bala qutqaryldy. Olar qatty tútinnen baspaldaq arqyly shyǵa almaı qalǵan.
«Birinshi qabattaǵy aýmaǵy 7 sharshy metr bolatyn tambýrda qoqystan órt shyqqan. ıAǵnı jataqhanaǵa kireberiste bólek esigi bar tambýr bolǵan. Turǵyndardyń aıtýynsha, ol únemi jabyq turǵan, biraq bizdiń boljam boıynsha, onda turaqty mekenjaıy joq adamdar turǵan. Olar osy bólmege túrli qoqysty – eski kıim-keshek, kórpeshelerdi tasyǵan. Órt solardyń janýynan shyqqan. Boljam boıynsha, temeki tuqylynan tutanýy múmkin», - deıdi SQO TJD jedel basqarý ortalyǵynyń bastyǵy Oljas Júnis.
Órtti sóndirýge 20 maman jáne 6 arnaıy tehnıka jumyldyryldy. Saǵat 00.16-da órt tolyq sóndirildi.
