Petropavlda jataqhanada bolǵan jarylysta jaraqat alǵan eki jigittiń beti beri qarady
PETROPAVL. QazAqparat – Petropavlda jataqhanada bolǵan jarylys kezinde eki jigit aýyr jaraqat alyp, jansaqtaý bólimshesine túsken. Otadan keıin olardyń jaǵdaıy jaqsardy, dep habarlaıdy QazAqparat tilshisi.
Esterińizge salaıyq, 21 aqpan kúni Petropavldaǵy jataqhananyń birinshi qabatynda gaz ballony jaryldy. 2 adam mert bolyp, 15-i túrli dene jaraqatyn aldy.
Aýyr jaraqat alǵan eki er adam Soltústik Qazaqstan oblystyq kópbeıindi aýrýhanaǵa jetkizildi. Ekeýi de 1997 jyly týǵan. Bireýinde ashyq bas-mı jaraqaty bolyp, tóbe súıegi synǵan, oǵan qosymsha jarylys kezinde 5-6 moıyn omyrtqasy zaqymdanǵan. Al ekinshisinde ashyq bas-mı jaraqatynan bólek, mıy soǵylǵan.
«Ekeýiniń de jaǵdaıy óte aýyr boldy. Bas súıekteri trepanatsııalandy. Mıdyń ishinen qandy isik alyndy. Moıyn omyrtqasy sıntezdeldi. Odan keıin 10 kúnnen artyq ýaqyt ótti. Qazir ekeýiniń de jaǵdaıy jaqsy», - deıdi SQO kópbeıindi aýrýhananyń bas dárigeri ıÝrıı Belonog.
Mamandardyń aıtýynsha, bir apta buryn ǵana naýqastardyń biri tereń uıqyda jatty. Ekinshisi qol-aıaǵyn qımyldata almady. Qazir ekeýiniń de jaǵdaıy jaqsy. Bul týraly naýqastar aýrýhananyń áleýmettik jelidegi paraqshasynda aıtyp, dárigerlerge alǵys aıtty .
«Jarylystan keıin jaraqat alyp, oblystyq aýrýhanaǵa aýyr jaǵdaıda tústim. Aıaq-qolymdy qımyldata almadym. Meni qutqardy. Eki kúrdeli ota jasady. Qazir ózdigimnen otyryp, júre alamyn. Qolymdy qımyldatamyn. Maǵan qoldaý bildirgen barlyq jandarǵa alǵysym sheksiz. Hırýrgterge, aýrýhana mamandaryna rahmet», - deıdi syrqattardyń biri.
Aıta keterligi, sol jarylysta denesi kúıip qalǵan boıjetken aýrýhanada qaıtys bolǵan edi.
