Petropavlda jataqhana órtenip, 119 adam qaýipsiz jerge shyǵaryldy
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, Petropavldaǵy Partızan kóshesi boıyndaǵy sektsııalyq úlgidegi jataqhanada órt kúndizgi saǵat 14.00 shamasynda shyqqan. Órt sóndirýshiler jetkende bes qabatty ǵımarattyń 4 qabatyndaǵy terezeden qara qoıý tútin shyǵyp jatyr eken. Mamandardyń aıtýynsha, bul óte qaýipti, órt kórshi bólmelerge jáne shatyrǵa aýysýy múmkin.
Órt sóndirýshiler birden úı turǵyndaryn – 119 adamdy, sonyń ishinde 23 balany qaýipsiz jerge shyǵardy. Evakýatsııalaý barysynda 5 qabattaǵy bólmelerdiń birinde aıaǵy aýyr jas áıeldiń qalyp qoıǵandyǵy belgili boldy.
«Bizge kók tútinge oranǵan saty arqyly eki qabatqa kóterilip, áıeldi alyp shyǵý mindeti turdy. Áıel qorqyp qalypty, aıy-kúni jetken, ári qoıý tútinnen oǵan qyryq basqyshpen tómen túsý ońaı bolǵan joq. Jolda esinen tanyp, biraz ábigerge tústik. Óıtkeni, bizge tútin men ıis tııýdiń saldary jaqsy tanys. Aman-esen taza aýaǵa shyǵaryp, dalada kútip turǵan jedel járdem qyzmetine tapsyrdyq», - deıdi órt sóndirý kezekshi qyzmetiniń jedel kezekshisiniń orynbasary Mereke Álimjanov.
19 jastaǵy Mádınaǵa alǵashqy medıtsınalyq kómek kórsetilip, aýrýhanaǵa jetkizildi. Óziniń de, balasynyń da densaýlyǵyna keler qaýip bolmaǵandyqtan sol kúni keshke úıine jiberildi. «Meni jáne balamdy qutqarǵan qutqarýshylarǵa alǵysym sheksiz. Jaǵdaıymyz jaqsy. Órt sóndirýshilerge eńbekterine tabys tileımin, qashan da aman-esen otbasylarymen qaýyshsyn», - deıdi Mádına.
Órt 5 sharshy metr aýmaqty qamtydy. Mamandardyń jyldam qımylynyń arqasynda kórshi bólmelerge jaıylǵan joq. Aldyn ala boljam boıynsha órttiń shyǵýyna elektr symdarynyń qysqa tuıyqtalýy sebep bolýy múmkin.
