Petropavlda jasóspirimnen týberkýlezdiń ashyq túri anyqtaldy
PETROPAVL. KAZINFORM – Petropavldaǵy mektepterdiń birinde bilim alatyn 16 jastaǵy er bala flıýorografııalyq tekseristen ótip, nátıjesinde qaýipti dert anyqtalǵan.
Áleýmettik jelide syrqattanǵan bala Petropavldaǵy №17 ulttyq órkendeý mektebiniń oqýshysy ekendigi aıtylady. Qala turǵyndarynyń aıtýynsha, sol mektepte balalary oqıtyndarǵa medıtsınalyq qyzmetkerler habarlasyp, tekseristen ótý qajettigin eskertken.
Soltústik Qazaqstan oblysy sanıtarııalyq-epıdemıologııalyq baqylaý departamentiniń málimetinshe, 14 shildede jasóspirimnen týberkýlezdiń bakterııa bóletin túri (MBT+) anyqtalýyna baılanysty medıtsınalyq uıymnan shuǵyl habarlama kelip túsken.
Osyǵan baılanysty vedomstvo óz quzyreti aıasynda epıdemııaǵa qarsy is-sharalardy bastady. Aýrý oshaǵynda qorytyndy dezınfektsııa júrgizilip, naýqaspen baılanysta bolǵan adamdar – otbasy músheleri, synyptastary, mektep muǵalimderi men tehnıkalyq personal tekserildi. Sonymen qatar jasóspirim tirkelgen jáne aýrý anyqtalǵan medıtsınalyq uıymdarǵa qatysty epıdemıologııalyq tekserý júrgizilip jatyr.
Mamandardyń aıtýynsha, bıyl birinshi jartyjyldyqta óńirde týberkýlezben aýyrǵandar sany azaıǵan. Týberkýlezdiń jańadan anyqtalǵan 68 jaǵdaıy tirkeldi. Bul ótken jyldyń sáıkes kezeńimen salystyrǵanda 20% nemese 17 jaǵdaıǵa az. Byltyr sáıkes kezeńde 85 adamnan dert anyqtalǵan.
18 jasqa deıingi balalar arasynda týberkýlezdi juqtyrý deńgeıi ózgergen joq. Jyl basynan beri Petropavlda týberkýlezdiń bakterııa bólmeıtin úsh jaǵdaıy tirkeldi.
Buǵan deıin Astanada týberkýlezge shaldyqqan balaǵa qatysty tekserý bastalǵanyn jazǵan edik.
