Petropavlda jasóspirim ázildep, mektebine jarylǵysh qoıylǵanyn habarlaǵan
PETROPAVL. KAZINFORM — Petropavlda polıtsııa terrorızm aktisi týraly kórineý jalǵan habarlaý faktisi boıynsha sotqa deıingi tergep-tekserýdi bastady.
Soltústik Qazaqstan oblysy polıtsııa departamenti baspasóz qyzmetiniń málimetinshe, 20 qazan kúni polıtsııaǵa Petropavldaǵy mektepterdiń birine jarylǵysh zat qoıylǵany týraly habarlama túsken. Oqıǵa ornyna dereý barlyq jedel qyzmet — tártip saqshylary, qyzmettik ıtteri bar kınologter jáne jarylǵysh zattardy zalalsyzdandyratyn mamandar jiberildi. Muqııat tekserilgenimen, ǵımarattan kúdikti zat tabylǵan joq.
Tergeý barysynda arnaıy qyzmetterdi aıaǵyna tik turǵyzǵan osy mekteptiń 14 jastaǵy oqýshysy ekeni anyqtaldy. Ol osylaısha «ázildemek» bolǵan.
Osy fakti boıynsha sotqa deıingi tergep-tekserý bastaldy. Qazir ıývenaldy polıtsııa ınspektorlary men pedagogter jasóspirimmen túsindirý jumystaryn júrgizip jatyr.
Polıtsııa jarylǵysh zat qoıylǵandyǵyn jalǵan habarlaý aýyr qylmystyq jaýapkershilikke ákep soǵatynyn eske salady. Zań buzýshylarǵa 5 myń AEK deıin aıyppul salý nemese bes jylǵa deıin bas bostandyǵyn shekteý ne aıyrý túrindegi jaza kózdelgen.
Buǵan deıin Aqtóbede órt sóndirýshiler eki kún qatarynan jalǵan habarlama alǵanyn jazǵan edik.