Petropavlda jasóspirimder polıtseılerdiń uıymdastyrýymen erekshe spektakldi tamashalady
PETROPAVL. QazAqparat - Petropavlda mektep oqýshylaryna qazaqstandyq avtor S.Baımuhametovtiń «Sny zolotye: ıspovedı narkomanov» atty kitabynyń jelisimen qoıylǵan spektakl kórsetildi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, jantúrshigerlik oqıǵa sahnalandyrylǵan kórinis qana bolǵanymen, balalardy beıjaı qaldyrmady. Ári kórermen oryndyqtary sahna ústine ornalastyrylyp, balalar qol sozym jerde otyrdy.
N. Pogodın atyndaǵy oblystyq drama teatrynyń rejısseri Tımýr Karımjanovtyń qoıylymy agressııaǵa, meırimsizdikke toly. Tar sahna beıneekranmen tolyqtyrylyp, jaryq jáne dybys - qosymsha áser berdi.
Teatr akterleri qoıylymdy polıtseılerdiń suraýy boıynsha sahnalady. «Verbatım» janry - jańa janr, derekti pesa negizinde kórkem boıamasyz, naqty adamdardyń monology negizinde quralady. Taǵy bir ereksheligi: spektaklden soń kórermenge sóz beriledi. Mamandardyń aıtýynsha, bul - aýyr kórinisten alǵan áserlerinen arylýǵa, kóz aldynda bolǵan oqıǵany oı eleginen ótkizýge septigin tıgizedi.
Polıtseıler qaıyrymdylyq kórsetilimdi №32, №42 mektepterdiń 10-synyp oqýshylaryna, Petropavl temirjol kolledjiniń jáne SQMÝ stýdentterine usyndy.
«Jas kórermenderdiń belsendi pikir bildirýleri bizdi qýantady. Boılarynda belsendi ómirlik ustanymdarynyń, berik prıntsıpteriniń bar ekendigin bildiredi. Bul qasıetterdiń ózi «ýdyń» arbaýyna túsýden, áýestenýden qorǵanys bolady. Spektaklge shaqyrý - Halyqaralyq esirtkige qarsy kúres kúnine arnalǵan aılyq aıasynda ótkiziletin is-sharalardyń alǵashqysy», - deıdi basqarma basshysy Jandos Basybaev.
Jandos Basybaevtyń aıtýynsha, túsindirý jumystary tereń emotsıonaldyq áser alýǵa arnalǵan kórnekti aktsııalarmen kezektesip otyrady. Olardyń ishinde - chempıondarmen ashyq jattyǵýlar, jazǵy demalys lagerlerindegi oıyndar, sporttyq is-sharalar da bar.
