Petropavlda jasóspirim bir kúnde úsh velosıped urlady
PETROPAVL. QazAqparat – Petropavlda 17 jastaǵy jasóspirim bir kúnde úsh velosıped urlap, qolǵa tústi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, tártip saqshylaryna Petropavldaǵy Zalmanov kóshesindegi úılerdiń biriniń turǵyny «Desna» markaly velosıpedtiń urlanǵany týraly aryzdanǵan. Ol velosıpedti ulynyń týǵan kúnine syıǵa satyp alǵan eken. Sol kúni bir saǵat óter-ótpesten Abaı kóshesinde taǵy eki velosıpedtiń urlanǵany týraly habarlama kelip túsedi.
Krımınaldyq polıtsııa qyzmetkerleri jedel-izdestirý sharalaryn júrgizip, nátıjesinde velosıped urlady degen kúdikpen Jumysshy kentiniń 17 jastaǵy turǵynyn ustady. Jasóspirim buǵan deıin de túrli quqyq buzýshylyqtar jasaǵany úshin jaýapqa tartylǵan bolyp shyqty. Jaýap alý barysynda ol velosıpedterdi qalaı urlaǵanyn ret-retimen aıtyp berdi.
«Desna» velosıpedin minip ketip, Abaı kóshesine shyqtym. Jolaı bir úıdiń podezinde qymbattaý velosıpedti kórdim. «Desnany» sol jerde qaldyryp, ekinshisine mindim. Keıin Rýjeınıkov kóshesinde úshinshi velosıpedti urlap, ótip bara jatqan adamǵa 20 myń teńgege satyp jiberdim», - deıdi kúdikti.
Qazir atalǵan derekterge «Urlyq» baby boıynsha sotqa deıingi tergep-tekserý júrgizilýde.
Aıta keteıik, qalalyq Polıtsııa basqarmasynda velosıpedterdiń derekter bazasy ashylǵan. Oǵan velosıpedterdiń nómirleri, markalary, túsi jáne ıeleriniń baılanys derekteri engizilgen. Aqparat udaıy tolyqtyrylyp turady. Jyl basynan bazaǵa 1212 velosıpedke qatysty málimet engizildi. Bul málimetter polıtseılerge urlanǵandy jyldam anyqtaýǵa, qylmysty ashýǵa kómektesedi. Bazaǵa velosıped týraly málimet engizý úshin bar bolǵany qalanyń kez-kelgen ýchaskelik pýnktine baryp, arnaıy saýalnamany toltyrý qajet.
