Petropavlda jas sýretshiler men fotograftardyń «Sheksizdik» atty kórmesi ashyldy
PETROPAVL. QazAqparat – Petropavlda mektep oqýshylarynyń sýret jáne foto kórmesi ótip jatyr. Jasóspirimder kórkem týyndylaryna BUU kedeılikti joıýǵa, teńsizdik pen ádiletsizdikke qarsy kúresýge, sondaı-aq klımattyq ózgeristerge baılanysty máselelerdi sheshýge baǵyttalǵan turaqty damýdyń 17 maqsatyn negiz etip alǵan, dep habarlaıdy QazAqparat tilshisi.
Petropavldaǵy saýda ortalyqtarynyń birinde ashylǵan kórme «Sheksizdik» dep atalǵan. Týyndylardyń avtorlary – Petropavldaǵy Nazarbaev zııatkerlik mektebiniń oqýshylary. Kórermen nazaryna 16 jumys qoıyldy.
Symbat Jamalbaı – áýesqoı fotograf. Mektep oqýshysy tabıǵat pen túrli ǵımarattardy sýretke túsirgendi unatady eken. Kórmede onyń 5 jumysy bar.
«Esil ózenin sýretke túsirý arqyly turǵyndardyń nazaryn ekologııalyq máselege aýdarǵym keldi. Taǵy bir fotoda ájemniń aýyly beınelengen. Ol Ońtústik Qazaqstan oblysynda turady. Balalyq shaǵym sol aýylda ótkendikten saǵynamyn, ári qashanda ystyq, onyń tabıǵatyn qyzyljarlyqtarǵa kórsetkim keldi», - deıdi Symbat Jamalbaı.
Jasóspirimder óz týyndylaryna maıly boıaýdan bastap, tsıfrlyq keskindemege deıin qoldanǵan. Áleýmettik máselelerdi, sonyń ishinde turmystyq zorlyq-zombylyqty óz eńbekterine arqaý etken.
«Shyn máninde oqýshylar ózderi usyndy bul taqyrypty. Sebebi, Birikken Ulttar Uıymynyń 17 maqsaty - bizdiń mektebimizde únemi talqynalatyn taqyryptardyń biri. Budan basqa kedeılikti joıý, teńsizdik, qalalardyń turaqty damýy degen sııaqty túrli jahandyq taqyryptar jaıynda oı qozǵaıdy», - deıdi Nazarbaev zııatkerlik mektebiniń óner páni muǵalimi Názıra Sádýaqasova.
Kórme erteń de jalǵasady. Bolashaqta bul kartınalar satýǵa shyǵarylyp, túsken qarjy qaıyrymdylyqqa jumsalmaq.
