Petropavlda jarylǵysh zat týraly habar jalǵan bolyp shyqty

PETROPAVL. QazAqparat – Petropavl qalasynda belgisiz bireýdiń «toǵyz qabatty turǵyn úıge jarylǵysh zat qoıyldy» degen habarynan keıin 123 adamdy qaýipsiz jerge shyǵarýǵa týra keldi, dep habarlaıdy QazAqparat tilshisi.

Soltústik Qazaqstan oblystyq Polıtsııa departamenti baspasóz qyzmetiniń málimetinshe, búgin tańerteń Petropavl qalalyq polıtsııa basqarmasynyń kezekshi bólimine N.Nazarbaev kóshesindegi 154-úıge bomba qoıylǵany týraly belgisiz er adam qońyraý shalǵan.

Oqıǵa ornyna kelgen quqyq qorǵaý organdary jedel bólinisteriniń qyzmetkerleri 123 adamdy, onyń ishinde 46 balany qaýipsiz jerge shyǵardy. 9 qabatty úı qorshaýǵa alyndy, jarylǵysh zattardy izdeý jónindegi mamandar ıisshil ıttermen ǵımaratty tekserip shyqty. Operatsııa bir jarym saǵatqa sozyldy. Osy aralyqta tártip saqshylary qońyraý shalýshyny da anyqtady. Ol 32 jastaǵy qala turǵyny eken. Buzaqylyq nıetpen habarlasqanyn moıyndady.

«Buryn kúdikti quqyq qorǵaý organdarynyń nazaryna ilikpegen, sottalmaǵan jáne basqa da jaýapkershilikke tartylmaǵan. Ustalǵan sátte ol mas kúıde bolǵan», - dep habarlaıdy SQO PD Ekstremızmge qarsy is-qımyl basqarmasynyń bastyǵy Rýslan Muhambetjanov.

Kúdikti Petropavl qalalyq Polıtsııa basqarmasyna jetkizildi, oǵan bultartpaý sharasyn qoldaný týraly másele qaralyp jatyr. Atalǵan fakti QR Qylmystyq kodeksiniń 273-baby «Terrorızm aktisi týraly kórineý jalǵan habarlaý» boıynsha Sotqa deıingi tergep-tekserýlerdiń biryńǵaı tizilimine engizildi.

«Quqyq qorǵaý organdarynda buzaqylyqpen qońyraý shalýshylardy anyqtaýǵa arnalǵan tehnıkalyq qurylǵylar bar. Bul bap boıynsha aıyppuldan bastap 5 jylǵa bas bostandyǵynan aıyrý jazasy kózdelgen» - deıdi Rýslan Muhambetjanov.