Petropavlda «jarylǵysh zat» saldarynan 300-den astam turǵyn evakýatsııalandy
PETROPAVL. QazAqparat - Petropavl qalasynda kópqabatty úılerdiń birinen 326 adam, sonyń ishinde 40 bala evakýatsııalandy, dep habarlaıdy QazAqparat tilshisi.
Telefonmen túsken habarlamaǵa sáıkes arnaıy qyzmetter dabyl boıynsha kóterildi. Belgisiz adam «102» nomerine Mıra kóshesi, 327A úıiniń jertólesine jarylǵysh zat ornatylǵany jóninde habarlaǵan.
«Úı qorshaýǵa alyndy. Jiti tekseristen keıin jarylǵysh zat ta, kúmándi ózge de zattar tabylmady. Qoǵamdyq tártiptiń buzylýyna jol berilgen joq», - dedi oblystyq Іshki ister departamentiniń baspasóz qyzmetinen.
Jalǵan aqparat bergen adam anyqtaldy. Ol osy úıde turatyn 25 jastaǵy jigit bolyp shyqty.
«Ekstremızmge qarsy kúres jónindegi basqarmanyń bastyǵy Rýslan Muhambetjanov málim etkendeı, er adamnan SIM-kartasymen birge telefon tárkilendi. Oblystyq narkologııalyq ortalyqtyń aktisine sáıkes, ol sol kúni jeńil túrdegi alkogoldik mas kúıinde bolǵan.
Atalǵan fakti «Terrorlyq akti týraly kórineý jalǵan aqparat berý» baby boıynsha Sotqa deıingi tergep-tekserý amaldarynyń biryńǵaı tizilimine tirkeldi. Bul bap 6 jylǵa deıin bas bostandyǵynan aıyrýdy kózdeıdi. Tergeý bastaldy.
«Osyǵan uqsas oqıǵa 20 shilde kúni boldy. Polıtsııaǵa Beskól aýdandyq ortalyǵynyń 40 jastaǵy turǵyny habarlasyp, temirjol vokzalyna bomba qoıylǵany týraly aıtty. Polıtseıler ony sol kúni ustady. Іsti jelilik ishki ister bólimi tergeýde», - dedi baspasóz qyzmetinen.
