Petropavlda jarty mln teńge turatyn akkýmýlıator urlandy
PETROPAVL. QazAqparat - Petropavlda urylar jalpy somasy jarty mln teńgeden asatyn júk kólikteriniń akkýmýlıatorlaryn urlaǵan. Osy qylmysqa qatysy bolýy múmkin degen kúdikpen Petropavl qalasynyń úsh turǵyny ustaldy, dep habarlaıdy QazAqparat tilshisi.
Polıtsııaǵa aýyr júk avtomobılderinen birneshe akkýmýlıator urlanǵany jóninde aryzdar kelip tústi. Barlyq qylmystar Petropavl qalasynyń óndiristik aımaqtarynda ornalasqan kásiporyndar aýmaqtarynda jasalǵan. Barlyǵy 5 oqıǵa tirkelip, shyǵyn somasy jarty mln teńgeden asqan.
Petropavl qalalyq Polıtsııa basqarmasynyń 1-shi polıtsııa bóliminiń qyzmetkerleri jedel aqparatpen jumys isteý barysynda úsh kúdiktini anyqtaldy. Olar urlyq jasaǵany úshin buryn sotty bolǵan 1990, 1993 jáne 1999 jyldary týǵan Petropavl qalasynyń turǵyndary eken. Urlanǵan zattardyń bir bóligi alynyp, ıelerine qaıtaryldy. Qylmystyń bul túrine 5 jyl merzimge deıin bas bostandyǵynan aıyrý jazasy qarastyrylǵan.
Birinshi PB bastyǵy Balabek Jahınniń aıtýynsha, júk kólikteriniń turaǵy beınebaqylaý kameralarymen jaraqtalmaǵan, jalǵyz kúzetshiniń kúzetý aýmaǵy aýqymdy bolǵan. Kásiporyn basshylary bolashaqta osy sııaqty jaǵdaılardy eskerýleri kerek.
