Petropavlda jarty jyldyń ishinde kóligine jalǵan nómir taqqan 5 adam anyqtaldy
PETROPAVL. KAZINFORM – Petropavlda jalǵan memlekettik nómirmen júrgen jigit sot sheshimimen bir táýlikke ákimshilik qamaqqa alyndy.
Endi onyń bir jyl boıy avtokólik júrgizýge quqy joq.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldyń 30 jastaǵy turǵyny «Lada 21214» avtokóligine jalǵan memlekettik nómir salyp júrgen. Polıtseıler bul faktini jol júrisi qaǵıdalaryn buzýdy avtomatty túrde tirkeıtin beınejúıeler arqyly anyqtady.
Protsessıngtik ortalyqtyń qyzmetkerleri jalǵan memlekettik nómirmen júrý faktisin anyqtaǵan jaǵdaıda polıtsııanyń barlyq múddeli qyzmetterine habarlaıdy.
Beınebaqylaý ınspektorlary jáne qol astynda «Megakam.Qorǵaý» baǵdarlamasy bar patrýldik ınspektorlar izdeýde júrgen avtokóliktiń júrgen jerin qysqa ýaqyt ishinde anyqtaıdy.
Tártip saqshylarynyń aıtýynsha, ótken jyldyń qyrkúıek aıynan bastap Petropavlda qosymsha ıntellektýaldyq beınejúıeler ornatylǵannan beri jalǵan memlekettik nómirlerdi paıdalanýdyń 5 faktisi anyqtalǵan. Búginde oblys ortalyǵynda mundaı beınejúıelerdiń sany 50-ge jýyq.
Buǵan deıin SQO aýmaǵynda 1 aqpannan bastap «Brakoner» jedel-profılaktıkalyq is-sharasy ótkizilip jatqanyn jazǵan edik. Bir apta ishinde tártip saqshylary ań aýlaý erejelerin buzǵan 88 faktini anyqtady.