Petropavlda jarǵa qulamaq bolǵan boıjetkendi polıtseı qutqaryp qaldy
PETROPAVL. QazAqparat - Soltústik Qazaqstan oblysynda polıtsııa qyzmetkeri jarǵa qulamaq bolǵan boıjetkendi qutqaryp qaldy, dep habarlaıdy QazAqparat tilshisi.
«Polıtsııa serjanty Denıs Komarov keshki aýysymnan qaıtyp bara jatqan. Ol Esil ózeniniń jaǵalaýyndaǵy jardyń shetinde bir boıjetkenniń sulbasyn, onyń tómenge qulaýdy oılap turǵanyn baıqaǵan. Ol jerdegi jardyń bıiktigi 25-30 metr ekenin bilgen polıtseı jarǵa jetken kezde tómende sýyqtan dirildegen, kóz jasyn tógip, sońǵy qadamyn jasaýǵa bekingen boıjetkendi kórgen. Anyqtalǵanyndaı, oqıǵadan birshama ýaqyt buryn boıjetken álgi polıtseıdiń janynan ótip bara jatyp, oryndyqqa uıaly telefonyn tastap ketken. Tártip saqshysy boıjetkendi telefonyn alyp ketýdi eskertedi. Alaıda, boıjetken ary qaraı júre bergen. Aqyry, onyń sýıtsıdke bel baılaǵany anyqtalǵan», - delingen oblystyq Polıtsııa departamentiniń baspasóz qyzmeti taratqan habarlamada.
Polıtseı kóp oılanbastan taıǵaq jarǵa túsip, boıjetkenniń janyna jetýdi oılaǵan. Alaıda, ony baıqaǵan qyz, ózine jaqyndamaýdy talap etken. Tártip saqshysy boıjetkendi sózge aınaldyryp, bir sátte ony qatty qapsyra ustap alǵan.
Oqıǵa Petropavl qalalyq Polıtsııa basqarmasynda sotqa deıingi tergeý tizimine QR QK-niń 105-baby boıynsha tirkeldi.
22 jastaǵy boıjetkendi týystary alyp ketti.
