Petropavlda janjal barysynda 17 jastaǵy bozbala er adamdy pyshaqtap tastady

Petropavlda 17 jastaǵy jasóspirim aýlalardyń birinde er adammen janjaldasyp, oǵan pyshaq suǵyp aldy, dep habarlaıdy Kazinform.

Soltústik Qazaqstan oblysy polıtsııa departamenti baspasóz qyzmetiniń málimetinshe, 21 qarasha kúni saǵat 20:32-de Petropavl qalasy polıtsııa basqarmasynyń "102" pýltine Seıfýllın kóshesindegi úıdiń aýlasynda janjal shyǵyp, belgisiz adamdar 51 jastaǵy er adamǵa pyshaq jaraqatyn salǵanyn habarlaǵan. Aýyr jaraqattanǵan zardap shegýshi birden aýrýhanaǵa jetkizildi.

Atalǵan fakt QR QK 293-babynyń 3-bóligi - "Buzaqylyq" boıynsha sotqa deıingi tergep-tekserýlerdiń biryńǵaı tiziliminde tirkeldi.

Jedel-izdestirý is-sharalary barysynda Petropavl qalalyq polıtsııa basqarmasynyń qyzmetkerleri buzaqylyq jasaǵany úshin 20 jáne 17 jastaǵy oblys ortalyǵynyń úsh turǵynyn anyqtap, ustady.

Aldyn ala anyqtalǵandaı, er adamǵa 17 jastaǵy jasóspirim pyshaq salǵan.

Ol buryn ártúrli quqyq buzýshylyqtar úshin birneshe ret qylmystyq jáne ákimshilik jaýapkershilikke tartylǵan.

Qazirgi ýaqytta ustalǵandarǵa qatysty bultartpaý sharasy anyqtalýda.