Petropavlda jańbyrdan soń sý basatyn kósheler tekserilip jatyr — qalalyq ákimdik

PETROPAVL. KAZINFORM — Petropavldyń keı kóshelerinde nóser kárizi múlde joq. Petropavl qalalyq ákimdiginiń málimetinshe, qoldanystaǵy nóser kárizi mol sý aǵynyna tótep bere almaı qalady, ótkizý qabileti shekteýli. Sol sebepti qazirgi ýaqytta qaladaǵy jıi sý basatyn ýchaskeler tekserilip jatyr.

— Tazartý, sý burý jáne sý ótkizý qurylystary kásiporny jabyq jáne ashyq jatqan nóser kárizderin tazartyp, sý sorǵyzý jumysyn atqaryp jatyr. Qosymsha aryqtar qazylady. Budan bólek áli de 16-17 tamyzdaǵy nóser jaýynnyń saldarymen kúresip jatyrmyz. Barlyq kórsetilgen mekenjaılarǵa apattyq brıgadalar baryp, arnaıy tehnıka qoldanyldy. Sý sorǵyzý jumysy jalǵasqan, — deıdi Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń bas mamany Oleg Gavrılov.

Mamannyń aıtýynsha, nóserden keıin saǵat 6.00-den túngi 00.00-ge deıin qala turǵyndary men uıymdarynan 100-den astam ótinish tústi, onyń 30-dan astamy qaıta habarlasqan. 

— Jalpy 15 myń tekshe metrden astam sý sorǵyzyldy. «Qyzyljar sý» kásiporny jáne qalalyq tazartý qurylystarynyń 20-dan astam sý sorǵyzý, káriz jýǵysh tehnıkasy, ekskavatorlary, 30-dan astam motopompa, 80-nen astam qyzmetker jumyldyryldy, — deıdi Oleg Gavrılov.

Esterińizge salaıyq, jańbyr uzaq ýaqyt boıy tolassyz jaýǵandyqtan, Petropavlda qalanyń keı kóshelerin jáne jer tólelerdi sý basyp, turǵyndardy ábigerge salǵan edi. 

Aqerke Dáýrenbekqyzy
eksklıýzıv