Petropavlda jańbyrdan keıin kósheler shalshyqqa aınalyp, jertólelerdi sý basqan
PETROPAVL. KAZINFORM – Saǵattap jaýǵan jaýynnan Petropavl kóshelerin sý basyp, jergilikti turǵyndardy áýre-sarsańǵa saldy.
Petropavldyqtar áleýmettik jelide baspanalaryna sý kirgenin aıtyp, beınejazbalar jarııalady.
«Orman» shaǵyn aýdany turǵynynyń aıtýynsha, olar bul máselemen eki jyl boıy kúresip keledi. Kóktemde nóser jaýyn jaýsa, mundaǵy úılerdiń jertólelerine sý kiredi. Sonyń saldarynan turǵyndardyń kóp dúnıesi sý astynda qalǵan.
Qazirgi ýaqytta osy máselege qatysty Petropavl qalalyq ákimdigine resmı saýal joldandy.
«Qazgıdromet» RMK Soltústik Qazaqstan oblystyq fılıalynyń málimetinshe, óńirge soltústik-batys tsıklony áser etip jatyr. Saldarynan Petropavl men Qyzyljar aýdanynda bir táýlikte aılyq norma – 43,6 mm jańbyr jaýǵan.
Mamandardyń aıtýynsha, erteń aspan ashyq bolady.
Buǵan deıin áleýmettik jeliler men messendjerlerde Almaty – Qostanaı baǵytymen qatynap júrgen jolaýshylar poıyzyndaǵy qolaısyz jaǵdaıdy kórsetetin beınejazba taraǵan bolatyn. Ondaǵy kadrlardan vagon ishine jańbyr sýynyń sorǵalap aǵyp jatqanyn kórýge bolady.