Petropavlda janarmaı quıý stansasyna shabýyl jasaldy
PETROPAVL. QazAqparat – Petropavlda avtokólikterge janarmaı quıý stansasyna qaraqshylyq shabýyl jasaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Petropavl qalalyq polıtsııa basqarmasyna Ýálıhanov kóshesindegi janarmaı quıý stansasyna qaraqshylyq shabýyl jasalǵandyǵy jóninde habar túsedi.
Oqıǵa keshke keshki segizder shamasynda bolǵan. Pavılonǵa betperde kıgen bireý kirip, kassırdi pyshaqpen qorqytyp aqsha talap etken. Kassırdiń dabyldy basyp úlgergenin kórgen qaraqshy birden qashqan.
Birinshi polıtsııa bólimi krımınaldy polıtsııa qyzmetkerleri beınebaqylaý kameralaryndaǵy jazbalardy qarap, qylmys jasalǵan aýdandy zerttedi.
Nátıjesinde, buryn sottalmaǵan Petropavl qalasynyń 26 jastaǵy turǵyny qolǵa tústi. Ustalǵa óz kinásin moıyndap otyr. Aıtýynsha, ol janarmaı quıý stansasyna oıda-joqta shabýyl jasaǵan, soǵan qaramastan ózimen birge medıtsınalyq betperde men pyshaq bolǵan.
Petropavl qalalyq Polıtsııa basqarmasy birinshi polıtsııa bólimi bastyǵy Balabek Jaqın málim etkendeı, bul qylmys «Qaraqshylyq» baby boıynsha tergelip jatyr. Kúdikti ýaqytsha ustaý ızolıatoryna qamaldy.
Polıtseılerdiń pikirinshe, qylmystyń izin sýytpaı ashýǵa beınekameralardaǵy jazbalar kóp kómektesken. Sondaı-aq, adamdardyń jyldam habar berýi de tártip saqshylarynyń jumysyn jeńildetken.
