Petropavlda Jańa jyldyq shyrshanyń shamy jaǵyldy
PETROPAVL. QazAqparat – Petropavl qalasynda búgin bas shyrshanyń shamy jaǵyldy. Bıyl da oblys ortalyǵyn meıramǵa oraı bezendirýge jergilikti bıýdjetten qarajat jumsalmaǵan, dep habarlaıdy QazAqparat tilshisi.
Jańa jyl meıramynyń basty atrıbýty – Petropavldaǵy eń úlken shyrsha Tuńǵysh Prezıdent saıabaǵynda ornalasqan. Shyrsha shamyn jaǵý saltanatyna kúnniń sýyǵy men boranǵa qaramastan adam kóp jınaldy. Ertegi keıipkerleri, Aıaz ata men Aqsha qar halyqtyń kóńilin kóterip, merekege kelgen halyqqa bı bıletti, oıyn oınatty. Jyldaǵy dástúr boıynsha Aıaz ata shyrshanyń shamyn jaǵyp, kele jatqan Jańa jylmen quttyqtady.
Petropavlda úshinshi jyl qatarynan qalany jańa jyldyq bezendirýge jergilikti bıýdjetten bir tıyn da bólinbeıdi. Bul - oblys ákimi Qumar Aqsaqalovtyń bastamasy. Byltyrǵy shyrsha bıyl qaıta qurylyp, endi merekeniń shyraıyn kirgizbek.
«Bıyl muz qalashyqtary ótken jylmen salystyrǵanda ájepteýir kóp bolady. Bul – balalardyń qysqy demalysyn qyzyqty ótkizýleri úshin jasalyp jatyr. Syrǵanaqtardy «Petropavl Kommýnhoz» JShS ázirledi. Al shaǵyn arhıtektýralyq músinderdi kolledj oqýshylary qalypqa keltirýge kómektesti. Bezendirýge demeýshilik jasaǵan azamattar da bar», - deıdi Petropavl qalasy ákiminiń orynbasary Asqar Habıbýlın.
Asqar Habıbýlınniń sózine qaraǵanda, Petropavl qalasynda taǵy eki yqsham aýdanda shyrsha bezendirilmek. Al búgingi is-shara merekelik kontsertke ulasyp, otshashýmen aıaqtaldy.
