Petropavlda jańa jyl qarsańynda jol apaty kóbeıdi
PETROPAVL. QazAqparat – Petropavlda jańa jyldyq mereke qarsańynda jol-kólik oqıǵalary kóbeıdi, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, ótken táýlikte Petropavlda jol-kólik oqıǵalaryna qatysty 20 materıal toltyrylǵan. Merekelik qarbalasta kólik júrgizýshileri qyraǵylyqty umytpaı, eki ese muqııatty bolǵany jón.
«Qazir qala kóshelerinde keptelis. Mereke qarsańynda jaqyndaryna syılyq, azyq-túlik alý úshin oblys ortalyǵyna aýyldardan kóp adamdar keledi. Jolda júrý erejesin qatań saqtaýǵa keńes beremiz. Qyraǵylyqty kúsheıtip, jolda barynsha uqypty bolyńyzdar», - deıdi SQO PD patrýldi polıtsııa batalonynyń komandıri Qanat Álimjanov.
Jaıaý júrginshiler de polıtseılerdiń nazarynda.
«Asyǵyp júrip, joldy belgilenbegen jerden ótýge bolmaıdy. Bastaryńyzdy qaýip-qaterge tikpeńizder. Qaýipsizdik birinshi orynda turýy qajet. Qazir merekelik qarbalas ekenin túsinemiz, syılyqtar, tátti-dámdi alý kerek. Arnaıy júrginshiler ótkelinen ótkende de jan-jaqqa qarap alyp, qaýipsiz bolǵanda ǵana ótýge bolady. Qazir qys, kóktaıǵaq. Kólik júrgizýshisi aldynan jaıaý júrginshi atyp shyqqanda kenetten tejeı almaıdy», - deıdi tártip saqshysy.
Joldardyń der kezinde tazalanyp, tıisti jaǵdaıda bolýyn da polıtseıler únemi qadaǵalap otyrady. Jeltoqsan aıynda óz mindetterin durys atqarmaǵan kommýnaldyq qyzmetterge 23 uıǵarym jáne 3 aqparattyq hat jiberildi.
