Petropavlda jańa yqsham aýdan boı kóterdi
PETROPAVL. QazAqparat - Petropavlda 10 sotyq jerge kezekke turǵandardyń sany 10 myńǵa jýyq. Qalalyq ákimdik jer telimderin berip qana qoımaı, ol jerge úı salyp berip jatyr, dep habarlaıdy QazAqparat tilshisi.
Petropavl qalasynyń shetinde «Solnechnyı-2» dep atalatyn jańa yqsham aýdan boı kóterdi. Munda birkelki joba boıynsha 200-den astam bir qabatty úı salynǵan. Qurylys «Nurly jer» baǵdarlamasy boıynsha júzege asyrylyp, baspanalar jer telimderine kezekte turǵandarǵa berilmek.
«Joba 2017 jyldan bastap júzege asyrylyp keledi. Baspanalar eki úlgi boıynsha salynyp jatyr. Úılerdiń aýmaǵy 70-90 sharshy metrge deıin, aýlalaryna kespe tas tóseledi. Oǵan qosa, eldi mekenge ınjenerlik jelilerdi tartý, jol salý josparlanǵan»,-deıdi Petropavl qurylys bóliminiń sektor meńgerýshisi Marııam Muqasheva.
Nysanda eki merdiger qurylys kompanııasy jumys istep jatyr. Kompanııa ókilderiniń aıtýynsha, úıler daıyn kúıinde tapsyrylady. Ashana men qonaq bólmesi qosylǵan, eki jatyn bólmesi bar. Ortalyqtandyrylǵan jylytý júıesi joq, ıaǵnı peshti turǵyn ózi jaǵady. Esesine sý úıge kirgizilgen, káriz júıesi tartylǵan.
«Qalalyq ákimshilik bankke alatyn kisilerdiń tizimin berýi tıis. Sol tizim boıynsha bank jumys istep, tólem qabilettiligin tekseredi. Úıdiń bir sharshy metriniń baǵasy 120 myń teńge», - deıdi «Turǵyn úı qurylys jınaq banki» AQ SQOF mamany Altaı Jýanyshpaev.
Petropavl qalalyq ákimdiginiń jer qatynastary bóliminiń resmı ınternet-resýrsyndaǵy aqparat boıynsha, oblys ortalyǵynda jer telimderi turǵyndarǵa 2014 jyldan berile bastady. Osy aralyqta 500-den astam ýchaske úlestirilgen. Qazir 10 sotyq jerge kezek 10 myńǵa jýyqtaǵan.
