Petropavlda jańa túzetý ortalyǵy ashyldy
ASTANA. QazAqparat - Petropavlda Táýelsizdik kúni qarsańynda múmkindigi shekteýli balalarǵa arnalǵan zamanaýı psıhologııalyq-pedagogıkalyq túzetý ortalyǵy ashyldy. Jańa mekemege Soltústik Qazaqstan oblysy ákimi Erik Sultanov bardy, dep habarlaıdy ákimdiktiń baspasóz qyzmetinen.
Óńir basshysy kabınetterdi aralap, ortalyqtyń materıaldyq-tehnıkalyq bazasymen tanysty.
«Munda barlyq jaǵdaı jasaldy. Jańa kabınet arqasynda balalarǵa mamandandyrylǵan psıhologııalyq-pedagogıkalyq qoldaý kórsetiledi. Ortalyq balalar úshin jaıly bolatynyna senemin», - dedi oblys ákimi.
Petropavldaǵy mekeme Qazaqstan boıynsha ashylǵan jetinshi ortalyq. Ortalyq «Samruk-Kazyna Trust» áleýmettik jobalardy damytý Qorynyń qoldaýymen «Dara» Qaıyrymdylyq Qory ashyp otyr.
Óz kezeginde «Dara» Qaıyrymdylyq Qorynyń jobalar basshysy Maral Sheshembekova oblys basshylyǵy men «Samruk-Kazyna Trust» áleýmettik jobalardy damytý qoryna erekshe qajettilikteri balalarǵa arnalǵan ortalyqtar jelisin keńeıtýge qoldaý kórsetkenderi úshin alǵysyn bildirdi.
«Barlyq balalar qabiletti jáne laıyqty bilim men damýǵa quqyly. Ýaqtyly jáne mamandandyrylǵan kásibı kómek kez kelgen balanyń ómirin jaqsarta túsýge, laıyqty jáne jarqyn bolashaǵyna múmkindik beredi», - dedi Maral Sheshembekova.
Jańa ortalyqta árbir erekshe balamen kásibı mamandardyń toby jumys isteıdi, olardyń ishinde pedagog-psıholog, defektolog, logoped, sýrdopedagog, emdeý dene shynyqtyrý nusqaýshysy, mýzykalyq-yrǵaqtyq dáristerdiń ustazy, emdeý massajynyń medbıkesi bar. Budan basqa, ata-analarǵa psıhologııalyq qoldaý men keńestik kómek kórsetiledi.
Jyl saıyn bul ortalyq damýynda túrli aýytqýlary bar 100-den astam balaǵa tegin mamandandyrylǵan jáne mamandandardyń keshendi kómegin usynady.
