Petropavlda jańa tennıs ortalyǵy ashyldy
ASTANA. QazAqparat - Búgin Memlekettik-jekeshelik seriktestik aıasynda Petropavl qalasynda ámbebap tennıs ortalyǵy ashyldy. Soltústik Qazaqstan oblysy ákimdigi men ForteBank sport nysanyna 1,7 mlrd. teńge ınvestıtsııa salǵan, dep habaralıdy QazAqparat.
Jergilikti ákimdik pen qarjy uıymynyń tabysty áriptestiginiń úlgisi ispetti bolǵan nysannyń qurylysy ótken jyldyń sáýir aıynda bastalyp, búginde jaıly sport ortalyǵy qalalyqtarǵa paıdalanýǵa berildi.
Bul jobaǵa eldegi balalar tennısin damytý boıynsha belsendi jumys júrgizip jatqan Qazaqstan tennıs federatsııasy bastamashy bolǵanyn aıta ketken jón. 
"Qazaqstanda tennıs oıyny joǵary deńgeıde tanylyp keledi. Jańa ortalyqta 250-den astam bala shuǵyldanady. 2019 jyldyń birinshi jartysynda Petropavlda ATF serııasy týrnıri, al 2019 jyldyń ekinshi jartysynda ITF serııasy halyqaralyq týrnıri ótedi. Endi sportshy jetkinshekter elimizdegi týrnırlerge qatysyp qana qoımaı, jaqyn jáne alys shetelderdiń kásibı tennısshilerin baqylaýǵa múmkindikteri bar", - dep túsindirdi tennıs federatsııasynyń vıtse-prezıdenti Dıas Dosqaraev.
Barlyq halyqaralyq talaptarǵa saı sport ortalyǵy Muz aıdyny saraıynyń janynda ornalasqan. Qazirgi eki qabatty keshenge tórt jabyq jáne úsh ashyq kort, 1 200 kórermenge arnalǵan trıbýnasy bar ortalyq kort kiredi. Jobanyń jalpy aýdany - 7 239 sharshy metr.
"Biz osyndaı mańyzy zor jáne ádemi jobanyń qatysýshysy bolǵanymyzǵa qýanyshtymyz. Áleýmettik jobalardy qarjylandyrý bizdiń qyzmetimizdiń mańyzdy quramdas bóligi bolyp tabylady, jańa sport ortalyǵy kásibı sportshylardy daıarlaý boıynsha qazirgi zamanǵy jattyǵý bazasy ǵana emes, Petropavl turǵyndary arasynda tanymal bolady dep senemin", - deıdi Fortebank basqarmasynyń tóraǵasy Gýram Andronıkashvılı saltanatty rásimde.
"Elbasy tapsyrmasymen qolǵa alynǵan Memlekettik-jekeshelik seriktestik aıasyndaǵy áleýmettik mańyzdy jobany júzege asyrý - biregeı tennıs ortalyǵyn salý bizdiń bankpen yntymaqtastyǵymyzdyń bir mysaly bolyp tabylady, ol búgingi kúnnen bastap qala turǵyndaryna jaıly tennıs korttarynda, voleıbol jáne basketbol alańdarynda ýaqyt ótkizýge múmkindik beredi", - dep atap ótti Qumar Aqsaqalov.
Jańa sport kesheninde kásibı jáne áýesqoı tennıspen aınalysý úshin barlyq jaǵdaı jasalǵan: dýshy bar kıinip, sheshinetin bólmeler, kafe, jattyǵý zaly, teorııalyq sabaqtarǵa arnalǵan konferents-zal bar.
