Petropavlda jańa teatr salynady

ASTANA. QazAqparat - Jańa teatr burynǵy ǵımarattan eki ese úlken bolady, dep habarlaıdy QazAqparat tilshisi.

Soltústik Qazaqstan oblysynyń ákimi Qumar Aqsaqalovtyń aıtýynsha, atalǵan bastama «Rýhanı jańǵyrý» aıasynda qolǵa alynyp otyr. «Bizdiń basty josparymyzdyń biri - Qazaq drama teatrynyń jańa ǵımaratyn salý. Oblystaǵy teatrymyz eski ǵımaratta ashylǵan. Buryn ol jerde energetıkterdiń mádenıet úıi boldy. Sahnasy da shaǵyn. 200-aq orny bar. Ol durys emes dep esepteımiz. Sondyqtan «Rýhanı jańǵyrý» baǵdarlamasy aıasynda qalamyzdyń jaqsy bir jerinde úlken Qazaq mýzykalyq drama teatryn ashaıyn dep otyrmyz. Qurylysy bir-eki aıda bastalyp ketedi. Ony kelesi jyly bitiremiz», - dedi Q.Aqsaqalov Astanada ótken baspasóz máslıhatynda.

Ákimniń aıtýynsha, búginde oblystyń mádenı ujymdary el ishinde ǵana emes, shetelge de gastroldik saparmen jıi shyǵyp turady. Máselen, byltyr olar Ispanııa, Italııa, Germanııa, Bolgarııa, Arab Ámirlikteri sııaqty elderge baryp, qazaqtyń ulttyq mádenıetin kórsetip qaıtty.

«Bıyl Maǵjan Jumabaevtyń 125 jyldyǵy, Qojabergen jyraýdyń 355 jyldyǵy, Aqan seriniń 125 jyldyǵy, Segiz seriniń 200 jyldyǵy. Osyndaı mereıtoılar oblys deńgeıinde ǵana emes, respýblıka dárejesinde de toılanatyn bolady. Ótken jyly jas aqyndardyń mektebin ashtyq. Mektep músheleri aýdan men aýyldy aralap, talantty balalarǵa dáris berip qaıtty. Ol balalar birneshe aıtysqa qatysty. Jeńimpaz atanǵandar az emes. Endi, osy jyldyń aıaǵyna deıin barlyq aýdandarda osyndaı mektepterdi ashatyn bolamyz», - dep atap kórsetti Q.Aqsaqalov. 

Aıta keteıik, Soltústik Qazaqstan oblysynyń ákimi Qumar Aqsaqalov Petropavl qalasynda dárigerler úshin bólek turǵyn úı salyp berýdi kózdeıdi.