Petropavlda jańa mektep máziri daý týǵyzdy: taǵamnyń 80% jelinbeı qalady
PETROPAVL. KAZINFORM — Petropavlda mektep ashanalarynda engizilgen jańa tamaqtaný standartyna qatysty daý týdy. Kásipkerlerdiń aıtýynsha, keı taǵam túrleri oqýshylar tarapynan jelinbeı qoqysqa tastalyp jatyr.
Bul másele Soltústik Qazaqstan oblysy kásipkerler palatasy janyndaǵy Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńeste qaraldy.
Ashanalardy jalǵa alýshylardyń múddesin qorǵaıtyn «Botaqan» qoǵamdyq birlestiginiń málimetinshe, birqatar pozıtsııalar boıynsha jelinbeý koeffıtsıenti 80% deıin jetken. Al qoldanystaǵy standartqa sáıkes, eger taǵamnyń 30% astamy jelinbeı qalsa, ol «joǵary táýekel aımaǵyna» engizilip, mázirdi qaıta qaraý qajet. Balalar kóbine balyq kotletin, jasyl burshaq garnırin, oramjapyraq oramasyn jáne sábiz-kartop ezbesin jemeıdi.
Kásipkerler taǵamdy bekitilgen mázirge saı daıyndaıtynyn, dám sapasyna shaǵym joq ekenin aıtady. Alaıda ata-analar tarapynan kiná taǵylyp, barlyq jaýapkershilik ashana ıelerine artylyp otyrǵanyna narazy.
Memlekettik organdardyń 19 aqpandaǵy birlesken keńes hattamasyna sáıkes, jetkizýshiler endi ata-analar jınalystarynda túsindirý jumystaryn júrgizip, balalardyń belgili bir taǵamdardy ne sebepti jemeıtinin taldaýy tıis. Alaıda Kásipkerler palatasynyń ókilderi bul mindet bıznes quzyretine kirmeıtinin alǵa tartty.
— Bul hattamada kásipkerlerdiń «Botaqan» qaýymdastyǵyna jekelegen taǵamdardyń jelinbeý sebepterine taldaý júrgizip, onyń nátıjelerin qaraý jáne tıisti sharalar qabyldaý úshin bilim basqarmasy men sanıtarııalyq-epıdemıologııalyq baqylaý departamentine joldaý tapsyrylǵan.
Alaıda bul fýnktsııalardy oryndaý kásipkerlik sýbektileriniń de, sondaı-aq mundaı ókilettikteri joq qaýymdastyqtyń da quzyretine kirmeıdi. Bizdiń pikirimizshe, tamaq sapasyn, daıyndaý tásilderin jáne ózge de máselelerdi aıqyndaýǵa qajetti barlyq áreket osy qoldanystaǵy standartta naqty belgilengen, — deıdi kásipkerler palatasynyń sarapshysy Olga Dostler.
Óz kezeginde sanıtarııalyq-epıdemıologııalyq baqylaý departamenti standartqa sáıkes mázirdi mektep dırektory brakeraj komıssııasymen birlesip ózgerte alatynyn túsindirdi. Degenmen tájirıbede mektep basshylary joǵarydan naqty nusqaýsyz jaýapkershilik alýǵa asyǵar emes.
Keńes tóraǵasy Inessa Kýanovanyń aıtýynsha, másele sheshilmeıinshe balalardyń bir bóligi ash qalyp, al jańa mázirge bólingen bıýdjet qarajaty qoqysqa ketip jatyr.
Buǵan deıin Atyraý qalasyndaǵy mektepterdiń oqýshylaryn ystyq tamaqpen qamtyp otyrǵan kásipkerler ár oqýshy úshin bólinetin aqshany 1 myń teńgege jetkizýdi suraǵanyn jazǵan edik.