Petropavlda jańa ınfektsııalyq aýrýhana salynyp jatyr
PETROPAVL. QazAqparat – Soltústik Qazaqstan oblysynda koronavırýspen kúresti kúsheıtý maqsatynda bes ottegi stansasy jáne ınfektsııalyq aýrýhana salynyp jatyr, dep habarlaıdy QazAqparat tilshisi.
Oblys ákimi Qumar Aqsaqalov qurylysy júrip jatqan densaýlyq saqtaý salasy nysandaryn aralap, jaǵdaıdy kórdi.
«Biz indettiń ekinshi tolqynyna daıyn bolýymyz kerek. Qazir óńirdegi aýrýhanalar ádettegi rejımde jumys istep jatyr. Qajet bolǵan jaǵdaıda olar 24 saǵattyń ishinde koronavırýsty juqtyrǵan syrqattardy emdenýge beıimdeledi.
Budan basqa tósek-oryn qory 2315-ten 3 400 orynǵa deıin ulǵaıtyldy. Bul shilde aıymen salystyrǵanda 1,5 esege kóp. Ókpeni jasandy jeldetý apparaty 3 ese – 81-den 228-ge deıin, ottegi kontsentratory 20 ese – 18-den 363-ke deıin jáne pýlsoksımetr 9 ese – 132-den 1 195-ke deıin kóbeıdi. Taıaýda 11 rentgendıagnostıkalyq apparat jáne 8 kóshpeli medıtsınalyq keshen alynady», - deıdi óńir basshysy.
Búginde Petropavlda bes ottegi stansasy salynyp jatyr. Budan basqa 200 orynǵa shaqtalǵan ınfektsııalyq aýrýhana salynyp jatyr. Jańa nysan ókpeni jasandy jeldetý apparatymen, kompıýter tomografııasy, ottegi kontsentratorymen qamtylady.
«Aýrýhana tıisti talaptarǵa saı salynady. Eń bastysy – aǵyndy jeldetý bolýy qajet. Nátıjesinde palatadaǵy aýa dálizge shyqpaıdy. Klınıka aımaqtarǵa bólinedi. Syrqattar em alatyn aımaq, jumys aımaǵy jáne dárigerler dem alatyn jer. Bul medıtsına qyzmetkerleriniń aýrýdy juqtyrýyna jol bermeıdi», - deıdi Qumar Aqsaqalov.
Óńir basshysy Petropavldaǵy kópsalaly aýrýhananyń qurylys barysyn da kórdi. Nysandy túrik ınvestorlary álemdik standartqa saı salyp jatyr.
«Óńirde onkologııa máselesi ótkir tur. Jańa aýrýhanaǵa 1,5 mlrd teńgeniń jelilik jeldetkishi ornatylady. Bul onkologııany emdeýdiń zamanaýı ádisi. Mundaı qondyrǵy qazir tek Nur-Sultan men Almatyda ǵana bar. Sol sebepti biz syrqattardy Almatyǵa jiberýge májbúrmiz.
Jalpy aýrýhana jańa tehnologııa boıynsha jabdyqtalady. Eýropalyq klınıkalardan esh kem bolmaıdy. Al turǵyndar sapaly medıtsınalyq qyzmetti MÁMS aıasynda tegin alady. Qazir óńir turǵyndarynyń 80 %, ıaǵnı 438 443 adam osy júıede saqtandyrylǵan», - deıdi Qumar Aqsaqalov.
