Petropavlda jańa esirtki túri - mefedron satqandar ustaldy
Soltústik Qazaqstan oblysy polıtsııa departamenti baspasóz qyzmetiniń málimetinshe, mefedron – qaýipti sıntetıkalyq esirtki preparattarynyń biri. Petropavlda alǵash ret aınalymnan alyndy.
Petropavldyń 29 jáne 19 jastaǵy eki turǵyny ótken jyldyń jazynda mefedron esirtkisin satyp, taratqany úshin ustaldy. Jaqynda olarǵa sot úkimi shyqty. Qylmyskerlerdiń bireýine 12 jyl, ekinshisine 7 jyl jaza kesildi.
Jedel ýákilder anyqtaǵandaı, oblys ortalyǵynyń turǵyny Ombydan tranzıtpen Petropavl arqyly Kókshetaý qalasyna sıntetıkalyq esirtkini jetkizýdi uıymdastyrǵan. Akvafor qutylarynyń súzgilerine býyp-túıilgen taýar logıstıkalyq qyzmet arqyly jetkizilip otyrǵan. Jedel is-sharalar barysynda zańsyz aınalymnan barlyǵy 200 grammǵa jýyq esirtki alyndy. Bul - asa iri mólsher bolyp esepteledi. Mefedrondy ınternet resýrstar arqyly satyp kelgen.
Esirtki zattarynyń bir bóligi Petropavldyń jas turǵynynan tabyldy, tergeý anyqtaǵandaı, ol dozalarǵa býyp-túıip, qalada túrli jerlerge jasyryp otyrǵan. Esirtki kýrerleri telegramm-kanal arqyly baılanysqa shyqqan.
QR Qylmystyq kodeksiniń «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» baby boıynsha ustalǵannyń ekeýi de sottaldy.
«29 jastaǵy jigit barlyq istiń úılestirýshisi bolyp tabylady, áleýmettik jelide habarlama jazysyp, baılanysqa shyǵyp, sálemdemeni qaıda, kimge jáne qashan jiberý kerektigine nusqaý berip otyrǵan. Sotta zattaı dáleldemeler usynyldy», - deıdi Esirtki qylmysyna qarsy is-qımyl basqarmasy bastyǵynyń orynbasary Ivan Terzıdı.
