Petropavlda jańa baspanaǵa suranys artty
PETROPAVL. QazAqparat – Petropavlda bıyl 300-den astam jeke turǵyn úı syrylyp, onyń ornyna kóp qabatty bıýdjettik úılermen qatar, kommertsııalyq baspanalar da salynyp jatyr, dep habarlaıdy QazAqparat tilshisi.
Investıtsııalyq jobalardy júzege asyrý boıynsha ótken jıynda Petropavl ákimi Bolat Jumabekov kommertsııalyq baspanalardy salýǵa basymdyq beriletinin aıtty. Bul – eskirgen jáne apattyq jaǵdaıda turǵan úılerdi buzý boıynsha arnaıy qabyldanǵan baǵdarlama negizinde júzege aspaq.
Tek bıyldyń ózinde oblys ortalyǵynda kommertsııalyq – 14, bıýdjet esebinen 26 turǵyn úı salynyp jatyr.
«Turǵyn úı qoryn qaıta jańartý baǵdarlamasy aıasynda endi jeke sektordaǵy eski úılerdi de buzýǵa múmkindik bar. Buryn negizinen apattyq jaǵdaıda turǵan kóp qabatty baspanalar ǵana syrylatyn. Bul bizge qurylysty jandandyryp, tek bıýdjettik qana emes, kommertsııalyq negizde de turǵyn úı salýǵa múmkindik berdi. Qazir 8 qurylys kompanııasy iske kirisýge daıyn», - dedi Bolat Jumabekov.
SQO ákimi Qumar Aqsaqalovtyń aıtýynsha, búginde mundaı úılerge suranys joǵary.
«Buryndary oblys ortalyǵynda nebary bir-eki kommertsııalyq úı boı kóteretin. Qazir keı jańa úılerdi irgetasy quıylyp bitpeı jatyp satyp alady. Suranys joǵary. Qurylys salasyn ári qaraı damytý qajet. Al ol óz kezeginde qurylys materıaldaryn shyǵaratyn kásiporyndardyń artýyna sep bolady. Qazir oblysta táýligine 150 myń kirpish shyǵaratyn kásiporyn salynyp jatyr. Qurylys materıaldaryn qymbatqa shetten tasymaı, ózimizde shyǵarýymyz kerek», - dedi oblys ákimi.
Petropavl ákimi Bolat Jumabektiń aıtýynsha, bes jyl buryn 13 turǵyn úı ǵana salynsa, bıyl qurylys qalanyń úsh shaǵyn aýdanynda 40 alańda júrgizildi.
«Byltyr jeke sektorda 200, bıyl 320 úı syryldy. Jyl sońyna deıin taǵy 117 buzylady. Turǵyndardyń 92 % ornyna páter aldy. Ol jerlerde negizinen bıýdjettik jáne kommertsııalyq baspanalar salynady», - dedi qala ákimi.
Jalpy, bıyl jyl sońyna deıin 300 myń sharshy metr baspana paıdalanýǵa berilse, keler jyly ony 400 myńǵa jetkizý mejesi qoıylǵan.
