Petropavlda jalǵyzbasty zeınetkerlerdiń úılerine órt datchıkteri ornatyldy
Oblystyq bilim jáne ǵylym qyzmetkerleri kásipodaǵynyń 8 myńnan astam múshesi bar. Uıym ustazdar kúni kásibı merekesi qarsańynda jalǵyzbasty ardager-ustazdarǵa syılyq jasap, úılerine órt datchıkterin ornatqyzdy.
«Biz óz zeınetkerlerimizdi umyt qaldyrmaýǵa tyrysamyz. Ár merekede quttyqtap, kezdesip turamyz. Bul joly olardyń qaýipsizdigi úshin úılerine órt dabylqaqqyshtaryn ornatýdy jón sanadyq. Jalǵyzbasty 6 zeınetkerimiz bar. Olardyń ekeýi Jumysshy kentinde, qalǵandary Kopaı, Bylǵary zaýyty aýdandarynda jer úılerde turady», - deıdi SQO bilim jáne ǵylym qyzmetkerleri kásipodaǵy komıtetiniń bas mamany Jandos Bazarbaev.
Tótenshe jaǵdaılar qyzmeti byltyr oblysta kópbalaly jáne áleýmettik az qymtylǵan otbasylardyń 538-ine ýly gaz jáne tútin datchıkterin ornatty. Bıyl mundaı qurylǵylardyń 249-y qoıyldy. Bul jumystar áli jalǵasyn tappaq.
«Egde jastaǵy adamdarda estý, kórý, ıis sezý qabileti tómendeıdi. Qart adamnyń órt kezinde tútinniń ıisin sezbeýi múmkin. Datchıkter tútin shyqqan ýaqytta birden habardar etip, órtti órshitpeı erte kezden sóndirýge múmkindik beredi. Órt oshaǵyn erte anyqtaý jurttyń múlkin, birinshi kezekte adamdardyń ómiri men densaýlyǵyn saqtaýǵa kómektesedi. Qurylǵylardy ornatýdan basqa turǵyndardyń peshterdi, gaz plıtalaryn, elektr jabdyqtaryn paıdalaný kezinde órt qaýipsizdigi talaptaryn saqtaý qajettiligi týraly jadynamalar taratylady. Sondaı-aq, olarǵa órt týyndaǵan jaǵdaıda áreket etý tártibi túsindirildi», - deıdi Petropavl qalasy TJB bas mamany Áset Shaıkın.
