Petropavlda jalǵan terrorıstik akt týraly habarlaǵan adam sottaldy
PETROPAVL. QazAqparat – Petropavlda kóp qabatty úıge jarylǵysh zat qoıylǵandyǵy týraly habarlaǵan er adam bir jylǵa bas bostandyǵynan aıyryldy, dep habarlaıdy QazAqparat tilshisi.
Petropavl qalalyq sotynyń málimetinshe, oqıǵa bıyl 9 qańtar kúni bolǵan. B. esimdi er adam mas kúıde dárihanaǵa kirip, farmatsevten «102» pýltine qońyraý shalyp, kóp qabatty úıge jarylǵysh zat qoıylǵandyǵy týraly habarlaýdy suraǵan.
Oqıǵa ornyna QR Ulttyq qaýipsizdik komıtetiniń SQO boıynsha departamenti, SQO TJD Órt sóndirý jáne avarııalyq-qutqarý jumystary qyzmeti, SQO polıtsııa departamenti jáne Petropavl qalasynyń polıtsııa basqarmasy, oblystyq jedel medıtsınalyq kómek ortalyǵy jedel attanyp, birneshe saǵat boıy jumys istedi, habarlamanyń jalǵandyǵyna kóz jetkizdi. Osylaısha birneshe arnaıy qyzmet materıaldyq shyǵynǵa batty.
Sottalýshy óziniń kinásin moıyndamady, ol tanysyn qaralap, bar kináni soǵan artpaq boldy. Alaıda onyń dálelderi rastalmady. Prokýror B.-ny kináli dep tanyp, oǵan naqty bas bostandyǵynan aıyrý jazasyn taǵaıyndaýdy surady.
«Daıyndalyp jatqan terrorızm aktisi týraly jalǵan habar taratqandarǵa 5 myń AEK-ke deıin mólsherde aıyppul salý, ne soǵan sáıkes túzeý jumystaryna tartý nemese bes jylǵa deıingi merzimge bas bostandyǵyn shekteý, ne sol merzimge bas bostandyǵynan aıyrý túrindegi jaza kózdelgen. Petropavl qalalyq soty er adamnyń kinásin jeńildetetin jaǵdaılardy anyqtaǵan joq. Onyń qylmysty mas kúıinde, sondaı-aq tótenshe jaǵdaı kezinde jasaýy onyń kinásin aýyrlatatyn mán-jaılar dep tanyldy», - delingen habarlamada. Petropavl qalalyq soty B.-nyń jeke basyn sıpattaıtyn derekterdi, onyń alǵash ret sottalǵandyǵyn eskere otyryp, 1 jylǵa bas bostandyǵynan aıyrdy.
Er adam jazasyn qylmystyq-atqarý júıesiniń eń tómengi qaýipsizdik mekemesinde óteıdi jáne keltirgen materıaldyq shyǵynnyń ornyn toltyrdy.
