Petropavlda zeınetkerlerdi aldap, múlkin ıelenip kelgen áıel ustaldy
PETROPAVL. QazAqparat - Petropavlda tártip saqshylary jalǵyz basty zeınetkerlerdi aldap, aqsha men dúnıesin qoldy etken kúdiktini ustady, dep habarlaıdy QazAqparat tilshisi.
Soltústik Qazaqstan oblystyq Polıtsııa departamenti baspasóz qyzmetiniń habarlaýynsha, oblys ortalyǵynyń birneshe zeınetkeri alaıaqtyq pen urlyq faktileri boıynsha polıtsııaǵa aryzdanypty. Qylmys jasalǵan sátte egde jastaǵy adamdar úılerinde jalǵyz bolǵan. Barlyq jaǵdaıda da olarǵa beıtanys áıel kelip, ózin «alys týysqanmyn» dep tanystyrǵan. Senimge kirgen soń baǵalardyń qymbattaǵany jaıly áńgime qozǵap, arzan baǵaǵa azyq-túlik alyp beretindigin aıtqan.
92 jastaǵy Oıqala aýdanynyń turǵyny ishi-baýyryna kirgen qonaǵyna óziniń jıǵan-tergen 300 myń teńge aqshasyn ustatyp jiberipti. Al «Cheremýshkı» kentiniń 79 jastaǵy turǵynynda qolda aqshasy bolmaǵanyn baıqaǵan alaıaq, zeınetkerdiń 29 myń teńge turatyn uıaly telefonyn qystyra ketipti.
Krımınaldyq polıtsııa bóliminiń qyzmetkerleri kúdiktiniń belgilerin beınekameralardyń kómegimen anyqtady. Ol Soltústik Qazaqstan oblysy aýmaǵynda krımınaldyq esepke alynbaǵan eken. Keıin Qostanaı oblysynyń tártip saqshylary ol áıeldi osyndaı alaıaqtyq jasaǵany úshin izdestirip jatqany anyqtaldy.
«Jedel izdestirý is-sharalary barysynda Qostanaı oblysynyń 55 jastaǵy turǵyny ustaldy. Ol alaıaqtyq jasaǵany úshin buryn sottalyp, Reseı Federatsııasynda jazasyn ótegen. Aıtýynsha, jalǵyzbasty qarttar týraly málimetti týystaryn izdegen bolyp, olardyń kórshilerinen alyp otyrǵan», - deıdi Petropavl qalalyq polıtsııa basqarmasy krımınaldyq polıtsııa bólimi bastyǵynyń mindetin atqarýshy Almaz Jákenov.
Kúdikti ýaqytsha ustaý ızolıatoryna qamaýǵa alyndy. Urlanǵan zattardyń bir bóligi qaıtaryldy. Qazirgi tańda kúdiktiniń basqa da qylmystarǵa qatystylyǵy tekserilip, tergeý amaldary júrgizilýde.
