Petropavlda zeınetkerlerdi aldap kelgen er adam 4 jylǵa sottaldy

Petropavlda alaıaqtyqpen aınalysyp, zeınetkerlerdi aldap kelgen er adam tórt jylǵa bas bostandyǵynan aıyryldy, dep habarlaıdy Kazinform. 

Petropavl qalalyq sotynyń málimetinshe, jumys izdegen 34 jastaǵy Petropavl turǵyny Telegram messendjerinde tolyq emes jumys kúni týraly habarlandyrýdy kóredi. Qyzyǵýshylyq bildirgen oǵan belgisiz adam alaıaqtyqpen aınalysýdy usynǵan.

Qylmystyq top kóbine zeınetkerlerge jaqyn týysy bolyp habarlasyp, jol-kólik apatyna túskenin aıtyp, máseleni sheshý úshin qomaqty soma suraıdy.

Zardap shekkenderdiń biri – Petropavldyń 78 jastaǵy turǵyny. Zeınetkerge qyzynyń jol-kólik oqıǵasyna ushyraǵany týraly qońyraý tamyz aıynyń sońynda kelip túsken. Telefon tutqasynan kómek suraǵan qyzynyń daýsyn estigen áıel abdyrap qalǵan. Keıin oǵan ózin «prokýrormyn» dep tanystyrǵan basqa áıel máseleni sheshý úshin 1 mln teńge qajet ekenin aıtqan. Zeınetker bar-jıǵan tergenin kýrerge, ıaǵnı «dropperge» ustatyp jibergen.

Sottalǵan J. osyndaı jábirlenýshilerden aqshany alyp ketip, ony belgili bir rekvızıtke aýdaryp otyrǵan.

Máselen, 2023 jyldyń tamyzynda alaıaqtar úsh zeınetkerdi quryqqa túsirip, jalpy somasy 3 mln teńgeni qaltaǵa basqan.

Aıyptalýshy kinásin moıyndap, istegen isine ókinetinin bildirdi. Sot onyń kishkentaı balasy baryn jáne buryn sottalmaǵanyn eskerdi.

Osylaısha oǵan ortasha qaýipsizdik mekemesinde jazasyn óteı otyryp, tórt jylǵa bas bostandyǵynan aıyrý týraly úkim shyqty. Zardap shekkenderge keltirilgen shyǵyndy J. tolyǵymen óteýi tıis.