Petropavlda záýlim, kópbeıindi sport saraıyn salý josparlanǵan
PETROPAVL. QazAqparat – Petropavlda jalpy aýmaǵy 33 myń sharshy metr bolatyn záýlim sport saraıy salynbaq. Qurylysqa qajet 8,3 ga ýchaske daıyn tur, dep habarlaıdy QazAqparat tilshisi.
SQO ákimdiginiń málimetinshe, jańa Sport saraıy kópbeıindi bolady, ol 17 zaldan jáne qosymsha úı-jaılardan turmaq.
Negizgi bóliginde 3124 kórermen sııatyn úlken ámbebap sport zaly bolady. Bul alańda shaǵyn fýtboldan, voleıbol, basketbol, gandboldan aýqymdy jarystardy ótkizýge bolady. Sondaı-aq ony kontsertterge, túrli is-sharalarǵa da qoldanýǵa bolady.
«Tehnologııalyq jaǵynan nysan birneshe avtonomdy bólikke bólinedi. Bul bir mezgilde birneshe is-sharany qatarynan uıymdastyrýǵa múmkindik bermek. Joba iske qosylǵan jaǵdaıda 200-den astam turaqty jumys orny ashylady. Búginde joba tolyq jasaldy, qazir memlekettik saraptamadan ótip jatyr», - dedi SQO ákiminiń orynbasary Sátjan Ablalıev.
Jalpy SQO-da sońǵy 5 jylda 8 dene shynyqtyrý-saýyqtyrý kesheni salynyp, qoldanysqa berildi. Bıyl taǵy tórteýi aýdan ortalyqtarynda salynyp jatyr.
Budan basqa bıýdjet pen jeke qarajatqa qysqy sport túrlerin damytý maqsatynda aýdan ortalyqtarynda 7 jabyq hokkeı korty salyndy. Bıyl taǵy ekeýiniń qurylysy Aıyrtaý, Taıynsha aýdandarynda qolǵa alyndy.
Al UEFA erejeleri men standarttaryna sáıkes bolý úshin Petropavldaǵy «Qarasaı» stadıonyn jańǵyrtý qajettigi týyndady. Búginde atqarylatyn jumystyń jobasy ázirlendi, merdiger kompanııa tańdap alyndy.
Joba boıynsha fýtbol alańy avtomatty túrde sýarylyp, jylytylady. Sondaı-aq jańadan jaryq tartylyp, elektrondy tablosy men dybystyq qondyrǵy aýystyrylmaq.
