Petropavlda zańsyz 9 páterdi ıemdengen ákimdik qyzmetkerleri sottaldy
«Sybaılas jemqorlyqqa qarsy is-qımyl ulttyq bıýrosynyń Soltústik Qazaqstan oblysy boıynsha departamenti buryn Petropavl qalasynyń Turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń quqyqtyq jumys jáne memlekettik satyp alý sektorynyń meńgerýshisi B. Ómirsetovaǵa, mekemeniń quqyqtyq jumys jáne memlekettik satyp alý sektorynyń ınspektory J. Esetovaǵa, sondaı-aq B. Ómirsetovanyń joldasy jáne J. Esetovanyń birge turatyn adamyna qatysty sotqa deıingi tergeý aıaqtalǵan bolatyn», delingen habarlamada.
Vedomstvonyń habarlaýynsha, tergeý barysynda kúdiktiler májbúrlep ıelikten shyǵarýǵa jatatyn páterderdi ıelengen. Olar sybaılastaryna resimdeı otyryp, jańa turǵyn úılerdegi 9 páterdi zańsyz alǵan. Memleketke keltirilgen shyǵyn kólemi 96 mln teńge boldy.
«Bıyl 17 mamyrda Soltústik Qazaqstan oblystyq sotynyń appelıatsıalyq soty B. Ómirsetova jáne J. Esetovanyń múlkin tárkileı otyryp, 6 jyl bas bostandyǵynan aıyrý jazasyna kesti. Olardyń sybaılastary - B. Ómirsetovanyń jubaıy men J. Esetovanyń birge turatyn adamy da múlikti tárkileı otyryp, 5 jyl bas bostandyǵynan aıyrý jazasyna tartyldy», delingen habarlamada.