Petropavlda zamanaýı Oqýshylar saraıy ashyldy

PETROPAVL. QazAqparat - Petropavlda sońǵy úlgidegi Oqýshylar saraıy ashyldy. Osyǵan oraı, oqýshylar men ata-analar úshin ashyq esik kúni uıymdastyrylyp, olar úıirmelerdiń jumysymen tanysty, dep habarlaıdy QazAqparat.

Joǵary tehnologııalyq bazasy bar «Digital URPAQ» saraıy «Tsıfrlyq Qazaqstan» aıasynda iske asyrylǵan jańa býynnyń ıntellektýaldyq damý ortalyǵy sanalady. Oqýshylar saraıy robototehnıka, bıotehnologııa, mehatronıka jáne 3D túptúrliliktiń ortalyǵy bolmaq

Soltústik Qazaqstan oblysy ákimdiginiń baspasóz qyzmetinen málim etkendeı, ashyq esik kúni mektep oqýshylary IT-tehnologııalardyń qyr-syrymen tanysýǵa múmkindik aldy. Kishkentaı qonaqtarǵa merekelik kontsert te uıymdastyryldy. Al fıto aımaqta balalar úshin robot-akter Tespıanmen fotoset ótkizildi. 

Saltanatty sharada sóz sóılegen oblys ákimi Qumar Aqsaqalov atalmysh nysannyń mańyzdylyǵyn atap ótti.

«Oqýshylar saraıy - Elbasynyń soltústikqazaqstandyq balalarǵa jasaǵan syılyǵy. Bul barlyq talaptarǵa jaýap beretin, álemdegi ozyq IT-tehnologııalar paıdalanylatyn zamanaýı biregeı ǵımarat. Ondaǵy bilim berý, tanymdyq dárister, robototehnıka, bıotehnologııa, mehatronıka, kórkemóner, mádenıet, shyǵarmashylyq, oıyn-saýyq úıirmeleri, naqty ǵylymdar ortalyǵy - bári balalarǵa arnalady. Oqýshylar saraıy - balalardyń búgingi kúni oryndalǵan armany dep esepteımin», - dedi Qumar Aqsaqalov.

Oqýshylar saraıynda bir mezgilde 1800 bala bilim ala alady. Qazir ortalyqta 87 úıirme ashylǵan.