Petropavlda volonterlerdiń kómegimen qylmysqa kúdikti 56 adam ustaldy
SQO Polıtsııa departamenti baspasóz qyzmetiniń málimetinshe, Petropavl qalalyq polıtsııa basqarmasy janynan volonterlik otrıad bıyl qańtar aıynda quryldy. Qazir onyń 60-tan astam múshesi bar. Olar negizinen kolledj oqýshylary men ýnıversıtet stýdentteri jáne túlekteri.
«Volonterlerdiń kómegi orasan. Olar oqýdan bos ýaqytta ýchaskelik polıtsııa pýnkterine kelip kómektesedi. Sanıtarlyq normalardy saqtaýǵa shaqyrǵan arnaıy aktsııalar kezinde býkletter men jeke qorǵanysh quraldaryn taratty. Qalalyq basqarma janynan qurylǵan volonterler otrıady aptasyna 7 kún, 24 saǵat jumys isteıdi desem, artyq aıtqandyq emes. Olardan basqa joǵalǵan adamdardy izdep tabýǵa bizge «Lider.kz» volonterlik qozǵalysy jáne esirtkimen kúreste «Qamqor» klýby járdemdesedi», - deıdi SQO Polıtsııa departamentiniń bastyǵy Marat Tólebaev.
Volonterlik otrıadtyń qatysýymen sońǵy toǵyz aıdyń ishinde 46 qylmys ashyldy. Kúdikti 56 adam ustaldy. Jastar 825 túrli ákimshilik quqyqbuzýshylyqty ashýǵa kómektesip, 845 tártip buzýshyny polıtsııa basqarmasyna jetkizdi.
Volonterlerdiń ólsheýsiz eńbegi eskerýsiz qalmady. Polıtsııa bólinisteriniń kezekti taratý jıynynda Petropavl qalalyq polıtsııa basqarmasynyń bastyǵy Jandos Muqatov bes volonterge departament bastyǵynyń atynan alǵys hat tabys etti.
«Alına Drýjına, Larısa Zýeva, Ksenııa Tomılova, Aleksandra Alına jáne Sábıt Bolatovtyń árqaısy sońǵy birneshe aı boıy polıtsııa qyzmetkerlerine zor kómek kórsetti. Olardyń jumysy ásirese tótenshe jaǵdaı men karantın qatańdatylǵan ýaqytta kózge tústi. Jastar jalǵyzbasty qarttarǵa emhanalardan dári-dármek jetkizdi», - deıdi ishki ister organdarynyń ardageri, volonterler otrıadynyń komandıri Petr Aksenov.
