Petropavlda volonterler 40 qylmys pen 670 ákimshilik quqyq buzýshylyqty ashýǵa kómektesti
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl qalalyq polıtsııa basqarmasy janynan volonterler jasaǵy bıyl qańtar aıynda quryldy. Onyń quramyna 62 adam bar. Olardyń basym bóligi – ýnıversıtette jáne qala kolledjderinde oqyp jatqan bolashaq zańgerler. Sondaı-aq, jasaq quramyna jekemenshik kúzet qurylymdarynyń qyzmetkerleri de kirgen.
Eriktiler ishki ister organdaryna kómek kórsetý arqyly jaqsy tájirıbe alady. Olar kóptegen baǵyttar boıynsha kómek kórsetedi: nashaqorlyqtyń aldyn alý, beınebaqylaý kameralary arqyly tártipti qadaǵalaý, patrýldeýge qatysý, is-qaǵazdaryn júrgizý sııaqty jumystar.
«Volonterler jumystaryn adal atqarady. Árqashan kómekke ázir. Kóktemde, karantın engizilgen kezde qoǵamdyq kólikterdiń júrmegenine qaramastan, qyz-jigitter kún saıyn, eki aýysymda, ardagerler men jalǵyzbasty qarııalarǵa qalalyq emhanalardan alatyn dári-dármek retsepterin jetkizýmen aınalysty. Jumys barlyq sanıtarlyq normalardy saqtaı otyra júrgizildi, árqaısysynan tózimdilik pen sergektik, eń bastysy - meıirimdilik talap etildi», - deıdi volonterler jasaǵynyń komandıri, otstavkadaǵy mılıtsııa podpolkovnıgi Petr Aksenov.
Jastar tamyz boıy karantındik sharalardyń saqtalmaýy ákimshilik jaýapkershilikke ákeletinin aıta otyra, jadynamalar men maskalar taratty.
Volonterler qoǵamdyq tártipti saqtaýǵa da belsene aralasqan. Olardyń qatysýymen jyl basynan 580-nen astam qoǵamdyq tártipti buzǵandar qalalyq polıtsııa bólimine jetkizildi.
«Volonterler 13 ýchaskelik polıtsııa pýnktterine bekitilgen. Ár ýchaske beınetirkeý júıesimen jabdyqtalǵan. Syrtqy beınebaqylaý kameralarynyń kómegimen eriktiler usaq buzaqylyq, spırttik ishimdikter ishý, qoǵamdyq oryndarda temeki shegý, abattandyrý qaǵıdalaryn buzý, belgilenbegen jerde ıtterdi serýendetý sııaqty ákimshilik quqyq buzýshylyqtardy anyqtaıdy.
Ákimshilik quqyq buzýshylyqtar anyqtalǵan jaǵdaıda aqparatty ýchaskelik
polıtsııa ınspektorlaryna beredi, ınspektorlar bolsa, oqıǵa ornyna shyǵyp, profılaktıkalyq áńgime júrgizedi nemese hattama toltyrady», - deıdi SQO PD bastyǵynyń birinshi orynbasary Qanat Aıtbaev.
Nátıjesinde Petropavldaǵy volonterler jasaǵy polıtseılerge 40 qylmys pen 670 ákimshilik quqyq buzýshylyqty anyqtaýǵa kómektesti.
