Petropavlda volonterler «30 ıgi is» áleýmettik qaıyrymdylyq jobasyna qatysty
Fılıaldyń baspasóz qyzmetiniń málimetinshe, volonterler qańǵybas ıt-mysyqtarǵa arnalǵan Petropavldaǵy baspanaǵa 10 keli jarma, 10 keli qurǵaq jáne 50 qorap qoıý azyq satyp alyp, jetkizdi.
Buǵan deıin óńirlik jasotandyqtar jalǵyzilikti zeınetkerlerdiń úıleriniń aýmaǵyn tazartýǵa kómektesti, qatty aıazdarda kommýnaldyq qyzmet jumysshylaryna tegin shaı men baýyrsaq taratty. Az qamtylǵan jáne kóp balaly otbasylardyń balalary úshin mereke uıymdastyrdy.
«Bul aktsııa «Biz Birgemiz» qozǵalysy volonterleriniń bastamasy. Igi iske oblystyń jas depýtattar korpýsy da óz úlesin qosty. Baspana basshylyǵymen sóılesip, olarǵa qandaı kómek qajet ekenin bildik. Gýmanıtarlyq kómek kóptegen janýarǵa ómir syılady dep oılaımyn. Bul jerge taǵy da kelemiz dep josparladyq», - deıdi «Jas Otan» JQ SQO fılıalynyń tóraǵasy Birjan Qudaıbergenov.
Jasotandyqtardyń aıtýynsha, olar jalǵyzbasty zeınetkerlerdi qamqorlyqtaryna alǵan. Bul joly «30 ıgi is» jobasy aıasynda volonterler qarttardyń úıine baryp, olardyń baqshalaryn retke keltirdi, aýlany qoqystan tazartyp, qysqa otyn daıyndaýǵa kómektesti.