Petropavlda «Volkswagen Passat» kóligi 39 jastaǵy áıeldi qaǵyp ketti
PETROPAVL. QazAqparat – Petropavldaǵy kóshelerdiń birinde jeńil kólik júrgizýshisi abaısyzda 39 jastaǵy áıeldi soqty, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, jol-kólik oqıǵasy 9 qyrkúıek kúni saǵat 8.30 shamasynda bolǵan. Petropavldaǵy Sátbaev kóshesindegi rettelmegen
júrginshiler ótkelinde «Volkswagen Passat» kóligi 1981 jyly týǵan áıeldi soqqan. Zardap shegýshi 3-inshi qalalyq aýrýhanaǵa jatqyzyldy.
57 jastaǵy Petropavl qalasynyń turǵyny jaıaý júrginshige jol bermeı, qaǵyp ketken. Atalǵan fakti boıynsha ákimshilik materıal jınaldy.Avtokólik arnaıy turaqqa qoıyldy.
«Joldaǵy qaýipsizdikke túrli faktorlar – jol jabyndysynan bastap, kórý jaǵdaıyna deıin áser etýi múmkin. Alaıda jol qozǵalysyna qatysýshylar jolda júrý erejelerin qatań saqtaýy kerek. Júrginshiler jolaǵyna, kóshe qıylystaryna kelgende júrgizýshiler jaǵdaıdy baǵamdap, durys sheshim qabyldap úlgerý úshin jyldamdyqty azaıtýlary qajet», - deıdi SQO polıtsııa departamenti bastyǵynyń birinshi orynbasary Qanat Aıtbaev.
Jalpy jyl basynan SQO joldarynda júrginshilerdi soqqan 31 jol- kólik oqıǵasy tirkeldi. Saldarynan 6 adam qaza tapsa, 29-y dene jaraqatyn aldy. 12 jaǵdaıda júrginshiler jolaǵynan ótý erejeleri saqtalmaǵan.
